Katër të vrarë në Velipojë, Basha: Pasojë e modelit që sundon vendin!
Pas konfliktit në plazhin e Velipojës ku mbetën të vrarë 4 persona dhe deklaratës së Kryeministrit Edi Rama se është momenti të përshpejtohet ristrukturimi i policisë me disa javë duke mos pritur fundin e verës, ka reaguar Kryetari i Partisë Demokratike, Lulzim Basha, duke theksuar kjo është pasojë e modelit që sundon vendin!
“Trushpëlarë, apologjistë me apo pa qira: boll akuzuat njerëzit për të keqen që ka plasur kudo! Është vetëm pasojë e modelit që sundon vendin!” thekson Lulzim Basha në reagimin e tij përmes rrjetit social Twitter duke përfunduar:
“Peshku qelbet nga koka!”
Ndryshe Kryetari i Partisë Demokratike, Lulzim Basha, reagoi pas ngjarjes tragjike në Velipojë ku u vranë katër persona dhe u plagosën dy të tjerë, ndërsa Kryeministri Edi Rama e nisi ditën me përshëndetje duke e shoqëruar me një foto nga bregdeti i Velipojës, pa përmendur ngjarjen.
“Kur policia reduktohet në vegël të regjimit për të mbrojtur pushtetin dhe lidhjet me krimin, kur përgjigja e vetme sa herë përgjaken qytetet tona është “hëngshin kokat e tyre”, jeta e qytetarëve, fëmijëve dhe familjeve shqiptare është në rrezik.,” thekson Lulzim Basha në reagimin e tij përmes rrjetit social Twitter për ngjarjen tragjike dhe sjelljen e Kryeministrit Rama duke përfunduar:
“Me postimin cinik si i sotmi pas masakrës së Velipojës, përgjegjësi për këtë situatë nuk e fsheh dot përgjegjësinë e tij, por vetëm rikonfirmon gjunjëzimin e shtetit para krimit të bërë njësh me pushtetin e tij të korruptuar deri ne palcë.”
Pas injorimit kriminal që i bërë ngjarjes tragjike të orëve të para të së ditës së sotme me postimin e fotos nga plazhi i Velipojës, dhe reagimit të ashpër të opinionit publik, Kryeministri Edi Rama e fshiu postimin nga profili i tij në Facebook.
Por edhe pse e fshiu këtë postim, pas reagimit të liderit të opozitës ai sërish bëri politikë duke folur nga Vlora për një ristrukturim në Policinë e Shtetit por jo dhe për vrasjen e katërfshtë e cila ndodhi aty ku mungoi shteti. Ai u mjaftua para gazetarëve me këtë deklaratë:
“Do t’ju kërkoj ndjesë për t’u larguar sepse kam thirrur ministrin e Brendshëm dhe disa nga drejtuesit kryesor të Policisë për të mos humbur kohë për të lançuar sa më shpejtë një fazë të re të ristrukturimit, që është përgatitur prej kohësh, por që për arsye të mirëkuptueshme është momenti të përshpejtohet me disa javë dhe të mos presim më fundin e verës.”
