KDI: Vetëm 44 % e qytetarëve e mbështesin kryesimin e dialogut Kosovë-Serbi nga Thaçi
Instituti Demokratik i Kosovës, KDI, sot publikoi rezultatet e sondazhit me opinionin publik, lidhur me fazën përfundimtare të dialogut Kosovë-Serbi dhe çështjet aktuale që janë trajtuar së fundi nga partitë politike si zgjedhjet e parakohshme.
Edhe ky sondazh ashtu si edhe politika nuk e mbështetë idenë e kryesimit të dialogut Kosovë-Serbi nga ana e Presidentit të Kosovës, Hashim Thaçi. Vetëm 44 për qind e qytetarëve të anketuar nga KDI e mbështesin idenë e kryesimit të këtij dialogu.
Violeta Haxholli nga KDI ka bërë të ditur se sa i përket pyetjes drejtuar qytetarëve të Kosovës se çfarë presin ata që të përmbajë marrëveshja përfundimtare në kuadër të dialogut Kosovë – Serbi, 61 për qind e tyre kanë deklaruar se presin që kjo marrëveshje të përmbajë njohjen shtetit të Kosovës nga Serbia, 56 për qind anëtarësimin e Kosovës në OKB, 22 për qind shkëmbimin e territoreve midis Kosovës dhe Serbisë, 25 për qind autonomi të zgjeruar për serbët e Kosovës.
Bazuar në sondazh, Haxholli ka thënë se 97 për qind e qytetarëve të anketuar kanë deklaruar se do të pranonin që rezultati i bisedimeve të fazës finale të jetë njohja e shtetit të Kosovës nga Serbia.
Ndërkaq të gjithë qytetarët nga komuniteti shqiptarë e pranojë këtë opsion kurse 91 për qind të komunitetit serb kanë deklaruar se nuk do të pranonin njohjen e shtetit të Kosovës nga Serbia.
Jeta Krasniqi nga KDI potencoi se në pyetjen se kush duhet të udhëheqë grupin negociator të Kosovës në bisedimet me Serbinë, 44 për qind e qytetarëve të anketuar kanë deklaruar se duhet ta udhëheqë presidenti Hashim Thaçi, 31 për qind e tyre mendojnë se duhet ta udhëheqin liderë nga opozita dhe 25 për qind janë të mendimit se grupin negociator në bisedime me Serbinë duhet ta udhëheqë kryeministri i Kosovës.
Në pyetjen se a mendojnë qytetarët e Kosovës se marrëveshja finale mes Kosovës dhe Serbisë do ta largojë përfundimisht ndikimin e Serbisë nga Kosova, Krasniqi ka bërë të ditur se 48 për qind e të anketuarve mendojnë se kjo nuk do të ndodhë me marrëveshjen përfundimtare.
Krasniqi ka theksuar se qytetarët janë pyetur nëse do të votonin në rast se zgjedhjet parlamentare do të mbaheshin të dielën e ardhshme. 45.3 për qind kanë thënë se do të votonin përfundimisht, 29.8 për qind ndoshta do të votonin, 6.9% me gjasë nuk do të votonin, 8.8 për qind definitivisht nuk do të votonin, 3.2% kanë deklaruar se nuk e dinë dhe 6.1 për qind kanë refuzuar të kthejnë përgjigje.
Të pyetur se për cilën parti politike do të votonin, vetëm nga votat e deklaruara 30.8 për qind kanë dhënë se do të votonin për Lidhjen Demokratike të Kosovës, 23 për qind për Partinë Demokratike të Kosovës, 21.2 për qind për Lëvizjen Vetëvendosje, 10.4% për Aleancën për Ardhmërinë e Kosovës, 6.3% Nisma Socialdemokrate, 2.4 për qind Partia Socialdemokrate, 2 për qind Lista Serbe dhe 4.1 për qind të tjera, ndërsa 11.6 për qind e të anketuarve kanë refuzuar të përgjigjen në këtë pyetje.
