KE: Negociatat me Shqipërinë dhe Maqedoninë në Qershorin 2019. Franca, Holanda dhe Danimarka: JO!
Ministri i Punëve të Jashtme i Greqisë, Nikos Kotsias ka konfirmuar se rreth çështjes së çeljes së negociatave me Maqedoninë dhe Shqipërinë, Bashkimi Evropian është i ndarë në dy grupe: 25 anëtaret e BE që mbështesin çeljen e negociatave për anëtarsim të Maqedonisë dhe Shqipërisë në verën e vitit 2019, dhe grupi i dytë prej tri anëtareve (Franca, Holanda dhe Danimarka) që e kundërshtojnë duke konsideruar se “procesi duhet ndryshuar,” raporton RFE.
“Ndryshimi i proceseve evropaine do të thotë ndryshimi i stabilitetit dhe sigurisë për gjithë rajonin,” tha Kotsias i cili foli në kulisat e takimit të Luksemburgut, ku po zhvillohet një debat i ashpër rreth rekomandimeve të Komisionit Evropian për çeljen e negociatave me Maqedoninë dhe Shqipërinë.
“E di që janë disa vende që kanë frikë nga populizmi. Nuk mund ta luftoni populizmin dhe të fitoni ndaj populizmit duke bërë hapa mbrapa,” tha Kotsias.
Gjermania ka kërkuar sot nga Franca dhe Holanda që të mundësojnë çeljen e negociatave me Shqipërinë dhe Maqedoninë në mënyrë që ta ndihmojnë stabilizimin e Ballkanit Perëndimor, pasi që diplomatët e BE nuk arritën të dakordohen rreth kushteve të negocimit, bënë të ditur Agjencia britanike e lajmeve Reuters.
Parisi dhe Haga angazhohen kundër përpjekjeve të BE që të çelin negociatat e anëtarësimit me dy shtetet, sepse Franca është e vendosur që Bashkimi Evropian fillimisht duhet të reformoj institucionet e veta para se të pranoj anëtaret e reja.
Por shtetet tjera, të kryesuara nga Berlini, po bëjnë presion që gjashtë shtetet e Ballkanit Perëndimor të anëtarësohen në BE në mënyrë që të forcohet ndikimi në rajon përballë Rusisë gjithnjë e më agresive, thekson Reuters.
