KED përzgjodhi 3 kandidatë, më 12 shtator zgjedhet një anëtar i Gjykatës Kushtetuese

Në mbledhjen e Posaçme të gjyqtarëve të Gjykatës së Lartë e cila do të mbahet më 12 Shtator, pritet të zgjedhet një anëtar i ri i Gjykatës Kushtetuese nga tre sa ka përzgjedhur Këshilli i Emërimeve në Drejtësi, KED.

Mësohet se për këtë vend vakant konkurrojnë tre kandidatë: Ilir Toska, Manjola Xhaxho dhe Holta Zaçaj.

Ndryshe, pas kontrollit të kryer KED dërgoi më 15 gusht listën e kandidatëve në Gjykatën e Lartë ku i pari është renditur gjyqtari i Apelit, Ilir Toska, aktualisht anëtar i Këshillit të lartë Gjyqësor, ku u vlerësua me 85.44 pikë, e dyta është renditur gjyqtarja Manjola Xhaxho me 83.34 pikë, ndërsa e treta gjyqtarja Holta Zaçaj me 82.2 pikë.

Njoftim:

Këshilli i Emërimeve në Drejtësi ka përcjellë në Gjykatën e Lartë më datë gusht raportin e miratuar dhe listën me dokumentacionin shoqërues të kandidatëve që kanë konkurruar për vendin vakant të Gjykatës Kushtetuese, të shpallur nga Gjykata e Lartë më datë 21.09.2019, rishpallur më datë 19.04.2019, rishpallur më datë 03.06.2021, si dhe rishpallur më datë 15.11.2021.

Zëvendëskryetari i Gjykatës së Lartë, z. Sokol Sadushi, në zbatim të detyrimeve ligjore që burojnë nga pika 3 e nenit 7/ç të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë” (i ndryshuar), nenit 4 të Rregullores së Mbledhjes së Posaçme të gjyqtarëve të Gjykatës së Lartë për zgjedhjen e anëtarit të Gjykatës Kushtetuese, si dhe të nenit 26, pika 2 të ligjit nr. 98/2018 “Për organizimin e pushtetit gjyqësor në Republikën e Shqipërisë”, ka vendosur thirrjen e Mbledhjes së Posaçme të gjyqtarëve të Gjykatës së Lartë, për të zgjedhur anëtarin e Gjykatës Kushtetuese, ditën e hënë, datë 12.09.2022, ora 10.00.