Kelmend, rrëzohet avioni, një fuoristradë merr të mbijetuarit pa ardh policia

Në zonën e Kelmendit, në Malësinë e Madhe, një avion i ngjashëm me atë të Divjakës i cili u rrëzua me drogë, bëri ulje të detyruar pasi, siç u tha, një defekti në motor. Brenda avionit kanë qenë dy persona, piloti dhe një pasagjer, të cilët kanë arritur të shpëtojnë.

Pas uljes së detyruar, piloti ka tentuar të fluturojë sërish, por nuk ja ka dalë. Më pas, aty ka mbërritur një mjet tip “Fuoristradë”, që i ka marrë dy personat dhe janë larguar, ende pa ardhë policia.

Ndryshe, nuk dihet ende nëse ata janë turistë, apo ngjarja lidhet me situatën e trafikut të kanabisit në vend. Gjithashtu, nuk dihet se ku ndodhen dy personat që ishin në avion.

Kryeplaku i Kelmendit, Prekë Vata, për News24 tha se pasi u rrëzua avioni, brenda të cilit mendohet se kanë qenë 2-3 persona në bordin e tij, i pari që mbërriti në vendin e ngjarjes ishte një bari. Personat që ndodheshin në avion i kishin kërkuar bariut që të largoheshin prej aty, ndërsa ata ka shkuar që t’i merrte një fuoristradë.

“Kam informacion. E mora informacionin nga banorët e lagjes dhe barinjtë. Aty afër nuk ka pasur njeri. S’ka shtëpi afër. Ky avion ka ardhur rreth orës 9 ose 9 e çerek. Është ulur në atë zonë, në lagje të Velipojës. Kanë pushuar nja gjysmë orë dhe kanë tentuar që të ikin nga kanë ardhur dhe kanë pësuar defekt, dhe kanë rënë në një livadh.

Banorët kanë ndjerë si punë granate (zhurmë) i pari erdhi një çoban. Erdhën dhe disa të lagjes. Kanë parë dy njerëz aty dhe nuk i kanë lënë të afrohen. Aq thonë, se më afër nuk i kanë lënë të afrohet. Njëri fliste shqip. Më pas erdhi fuoristrada. “Mos u afro këtu. Mos u afro as një hap më këtej, largohu!’. Në zonë kanë qëndruar rreth 30 minuta. Në atë moment kanë qenë larg. Tërë verës vinin turistë dhe zbrisnin me parashutë. Jam duke pritur policinë këtu që të vijë. Nuk jemi aty afër”, tha Kryeplaku i Kelmendit, Prekë Vata.