Kemi hyrë në një epokë kërcënimi! Edi Rama: Opozita e zhytur në buxhetin e rublave!

Mëngjesin e filloi nga zyra e Partisë Socialiste, për t’ju thënë shqiptarëve përmes rrjetit social Facebook se do të dalë fitues në zgjedhjet lokale ndërsa pas mbledhjes s Kryesisë së PS, ashtu sikur se në kohën e pandemisë foli për krizën, kërcënimet, armiqt, dhe normalisht nuk munguan akuzat kundër opozitës por tashmë të pasuruara me rublat ruse, ato që rritën dhe ngritën partinë kriminale që ai drejton.

“Kemi bërë një diskutim të frytshëm dhe natyrisht që kemi ndarë edhe detyrat në bazë të këtij aktivitetit që nis nesër për tu shtrirë në të gjithë Shqipërinë dhe për të komunikuar  për qeverisje vendore. Kemi hyrë në një epokë të një kërcënimi të madh. Ne si pjesë  e Europës jemi të detyruar të përballemi me kërcënime të kësaj epoke, që ka sjellë si pasojë përveç bombave dhe krimeve në Ukrainë edhe rritjen e çmimeve të energjisë, në të gjithë botën, dhe sigurisht edhe në Shqipëri. Është Inflacion lufte dhe kosto që i paguan aventurës së diktatorit si Putin,” tha Edi Rama pas mbarimit të mbledhjes së Kryesisë së PS, duke vazhduar me propagandën e inflacionit të armikut dhe çmimit të energjisë, për të cilin ka kohë që thotë se ka shkuar deri 700 euro MWh por jo edhe sa MWh i ka shitur me këtë çmim të rritur:

“Edhe pse nuk ka sjellë qeveria inflacionin, i takon qeverisë të lehtësojë peshën e kësaj lufte, mbi shpatullat e familjeve. Kemi bërë gjithçka kemi mundur. Po finalizojmë buxhetin e vitit të ardhshëm që është dyfishi i buxhetit 2013 që tregon se ka ndryshime pozitive. Ky dyfishim është i bazuar tek domosdoshmëria që t’i mbështesim të gjithë. Plani për të mbrojtur çmimin e energjisë për familjen dhe biznesin, urojmë të jetë. Urojmë të ketë shi, pasi dihet se ne jemi të varur  nga burimet ujore. Duke pasur më shumë prurje shiu kemi më pak nevojë të dalim me import. Do të dalim, edhe sikur të kemi  plot e për plot, Shqipëria nuk prodhon sa për të përmbushur të gjitha nevojat. Jemi besimplotë se do e kapërcejmë këtë dimër pa dhimbje të mëdha. Masat dhe mbështetja që do i japim kategorive, do e lehtësojmë”, tha Kryeministri Edi Rama duke e akuzuar sërish opozitën se është e zhytur në thesin e rublave ruse.

“Në këtë epokë kërcënimi të madh, kur Shqipëria nuk bën përjashtim nga kërcënimi, kur na duhet të përballemi me pasojat që është e re dhe vjen te ne siç erdhi tërmeti, pandemia, duhet të jemi të qartë, të vendosur, të bashkuar, të lidhur me partnerë të fuqishëm. Do ishte mirë të kishim një opozitë që të rrinte mirë në këtë kontekst,  por kemi një opozitë që premton vetëm izolim nga bota dhe nga ana tjetër është e zhytur në buxhetin e rublave,” tha Kryeministri Edi Rama duke përfunduar:

“Është fatkeqësi, edhe veprimtaria, edhe mënyra se si vepron në mënyrë të përditshme mbajnë erë. Ajo çka dimë nuk është e gjitha ajo që duhet ditur.”