Kemi një marrëveshje, Yuri Kim: Topi në fushën e mikut tim Luli Basha

Më fund, Ambasadorja e SHBA në Tiranë, Yuri Kim, bëri të ditur se ka marrëveshje për Reformën Zgjedhore. Menjëherë pas përfundimit të Këshillit Politik dhe largimit nga rezidenca e Ambasadës së SHBA të Përfaqësuesit të Opozitës së Bashkuar në Këshill, Oerd Bylykbashi, Ambasadorja Kim në një dalje publike me Ambasadorin e BE-së, Luigi Soreca dhe Ambasadorin britanik Duncan Norman, duke falënderuar të gjitha palët tha se e kanë atë që mund të jetë një marrëveshje që e fut Shqipërinë në një rrugë drejt BE.

“Ishte një ditë e gjatë. 9 orë dje dhe bëmë shumë progres. Kishim 9 orë të tjera sot dhe bëmë progres të jashtëzakonshëm. Në një negociatë që është kaq e rëndësishme për Shqipërinë, çdo pale dhe partie i kërkohet të japë që Shqipëria të fitojë. Çdo palë dha dhe çdo palë fitoi. Populli shqiptar do fitojë më shumë. Çdo palë dhe çdo parti dha dhe më duhet ti jap merita të veçanta partisë në pushtet. Ne e bëmë të qartë se partia në pushtet ka provilegje dhe ata do të jepnin më shumë. Dhe ata e bënë. E përgëzoj partinë në pushtet për atë që kanë bërë,” tha Ambasadorja amerikane Yuri Kim duke e bërë të qartë se e kanë Marrëveshjen që e fut Shqipërinë në një rrugë drejt BE

“Ne kemi atë që mund të jetë një marrëveshje që e fut Shqipërinë në një rrugë drejt BE. Realizuam masat që kërkoi ODIHR. Bëmë disa hapa domethënës që nuk janë rekomanduar nga ODIHR, por që mund ta shtyjnë përpara Shqipërinë.,” tha Ambasadorja e SHBA në Tiranë, Yuri Kim duke përfunduar:

“Ka ardhur koha për opozitën dhe mikun tim Luli Basha që të barazpeshojë të gjithë faktorët dhe të thotë “PO” për popullin shqiptar dhe të thonë “PO” për Shqipërinë. Topi është në fushën e tij. E ardhmja është dorën e tij.”