Keqardhje, Lulzim Basha: Tezat e Edi Ramës i dëgjova nga goja e Sali Berishës!
Pas reagimit të liderit historik të Partisë Demokratike, Sali Berisha, ndaj vendimit të Kryetarit të PD për ta përjashtuar nga Grupi Parlamentar, Lulzim Basha ka shpreh keqardhje që tezat e kundërshtarit të vetëm të tij dhe Partisë Demokratike, Edi Ramës, sot i ka dëgjuar të artikuluara nga goja e Berishës.
“Kam ndjekur me dhimbje të madhe reagimin e doktor Berishës, konsideratën për të cilin e kam shprehur në mënyrë të plotë dhe të qartë mbrëmë dhe asaj nuk i lëviz asnjë presje. Dhimbja që ndiej në nivel personal dhe njerëzor për vendimin që jam detyruar të marr dje, është dyfishuar sot nga gjuha e përdorur nga zoti Berisha, por shpresoj dhe uroj që koha të jetë ilaçi më i mirë dhe të gjithë të fokusohemi te armiku i vetë i Shqipërisë dhe i shqiptarëve që është rregjimi i Edi Ramës, problemi kryesor për te sotmen dhe të nesërmen e shqiptarëve,” tha Lulzim Basha duke shtuar se Partia Demokratike nuk ka rrugë tjetër përveçse e bashkuar ti prijë kësaj beteje për shqiptarët dhe për Shqipërinë.
Ndryshe, pas përjashtimit nga Grupi Parlamentar i PD, Ish-Presidenti Sali Berisha e bëri të qartë se sot nis beteja për shpëtimin e Partisë Demokratike dhe të Shqipërisë nga pazaret e turpshme të Lulzim Bashës dhe Edi Ramës ndërsa garantoi se PD do të dalë nga kjo betejë më e fortë dhe më e sigurtë në fitore.
Deklaratë:
Lulzim Basha: Kam ndjekur me dhimbje të madhe reagimin e doktor Berishës, konsideratën për të cilin e kam shprehur në mënyrë të plotë dhe të qartë mbrëmë dhe asaj nuk i lëviz asnjë presje. Dhimbja që ndiej në nivel personal dhe njerëzor për vendimin që jam detyruar të marr dje, është dyfishuar sot nga gjuha e përdorur nga zoti Berisha, por shpresoj dhe uroj që koha të jetë ilaçi më i mirë dhe të gjithë të fokusohemi te armiku i vetë i Shqipërisë dhe i shqiptarëve që është rregjimi i Edi Ramës, problemi kryesor për te sotmen dhe të nesërmen e shqiptarëve.
Pyetje: A ka një pazar mes ju dhe zotit Rama siç thotë zoti Berisha?
Lulzim Basha: Edhe njëherë shpreh keqardhjen e thellë që tezat e kundërshtarit të vetëm, timin, të Partisë Demokratike, të çdo shqiptari të ndershëm, të Edi Ramës, sot i kam dëgjuar të artikuluara nga goja e një njeriu, vlerësimin për kontributin e të cilit e kam dhënë dje i qëndroj edhe sot.
Pyetje: A rrezikon Partia Demokratike të përçahet zoti Basha?
Lulzim Basha: Partia Demokratike nuk ka rrugë tjetër nuk ka rrugë tjetër përveçse e bashkuar ti prijë kësaj beteje për shqiptarët dhe për Shqipërinë. Ju faleminderit!
