Kërcënim me bombë, mbyllet Aeroporti “Adem Jashari”

Policia e Kosovës ka konfirmuar se ka marrë një kërcënim me bombë në Aeroportin Ndërkombëtar “Adem Jashari”.

“Policia e Kosovës sot në orët e paradites ka pranuar një informacion me përmbajtje kërcënuese, për mjete shpërthyese në aeroportin ndërkombëtar “Adem Jashari” në Prishtinë. Bazuar në këtë informacion, Policia e Kosovës në bashkëpunim dhe koordinim me institucionet relevante, ka ndërmarrë veprimet e menjëhershme policore, ku për shkaqe sigurie ka mbyllur përkohësisht aeroportin”, thuhet në komunikatë.

Me qëllim të hetimit, kontrollit dhe masave të sigurisë, Policia ka bërë të ditur se kanë angazhuar njësitet relevante, teksa ka kërkuar mirëkuptimin e të gjithë qytetarëve.

“Policia e Kosovës do të vazhdoj të ju mbaj të informuar lidhur me zhvillimet e mëtejme deri në hapjen e aeroportit për qarkullim”, thuhet në komunikatën e Policisë.

Ndërkohë, zëdhënësja e këtij aeroporti, Valentina Gara ka thënë se janë evakuuar udhëtarët dhe personeli nga aeroporti.

“Konfirmojmë se kemi pranuar një kërcënim me bombë. Udhëtarët dhe personeli janë evakuar dhe janë të sigurt. Ekipet e involvuara në planin emergjent janë duke kryer detyrat e tyre,” ka sqaruar Gara.

Pas realizimit të kontrollit në objekte dhe hapësira të Aeroportit Ndërkombëtar “Adem Jashari” në Prishtinë, ka rezultuar se nuk ka ndonjë mjet shpërthyes, dhe se kanosja me mjete shpërthyese ka qenë një alarm i rremë me qëllime të caktuara.

Kështu, shprehet Policia e Kosovës përmes një komunikate pas përfundimit të kontrollit ndërsa aerporti vazhdoi punën normalisht.

“Pas përfundimit të kontrollit dhe punëve nga institucionet relevante, funksionimi dhe qarkullimi në aeroport i është kthyer normalitetit, andaj i falënderojmë qytetarët për mirëkuptimin dhe bashkëpunimin e treguar me institucionet e Republikës së Kosovës”, njofton Policia e Kosovës.

Kërcënime të tilla ka pasur edhe muaj më parë, por pas hetimeve nga njesitet e Policisë ka rezultuar se alarmet për bombë kanë qenë të rrejshme.