Kërcënime me bombë në 41 shkolla fillore, mbyllen të gjitha shkollat në Mal të Zi

Ministria e Arsimit e Malit të Zi ka bërë të ditur sot se 41 shkolla fillore kanë marrë kërcënimin me vendosjen e shumë bombave, por për shkak të panikut të shkaktuar janë mbyllur të gjitha shkollat në vend, tha zëdhënësi i Ministrisë, Bojan Knezheviç

Nga Drejtoria e Policisë është bërë e ditur se ekipet janë në shkolla dhe kontrollet vazhdojnë. Për momentin është vërtetuar se në shkollat e qytetit të Rozhajes nuk ka mjete shpërthyese, raporton televizioni publik i Malit Zi, TVCG.

“Në territorin e shkollës janë vendosur shumë bomba. Gjithmonë kemi ëndërruar për hakmarrje. Ne do të hakmerremi, do të vijmë në shkollë. Të gjithë do ti vrasim. Askush do të mbetet gjallë. I gjithë qyteti do të përgjaket,” ishte mesazhi i cili u ishte dërguar 41 shkollave fillore.

Ndryshe, herët në mëngjes janë evakuuar shkollat në Podgoricë, Ulqin, Tivar, Nikshiç, Berane, Bijello Pole, Kolashin, Herceg Novi, Budvë, Cetinje, Andrijevicë, Kotor, Rozhaje, ndërsa paralajmërimi për bombë ishte dërguar edhe në Komunën dhe Gjykatën e Tivarit.