“Kërcënimi, vjedhja dhe blerja e votës”/ Reagimi, Pjerin Ndreu: Punë normale me socialistët!

Pas publikimit të përgjimeve nga gazeta gjermane “Bild”, Ish-deputeti socialist që është në garë për kryetar Bashkie të Lezhës, Pjerin Ndreu, i cilëson kërcënimet e tij përmes telefonatave punë normale me socialistët.

Pjerin Ndreu reagoi menjëherë pasi nga përgjimet e “Bild” rezultoi se ai ishte pjesë e skemës së ngritur për blerjen e votave në Dibër në zgjedhjet e 2017 jo duke mohuar gjë, por duke e konsideruar një socialistë si një leckë që ndrydhet e shtrydhet, e në fund pse të mos flaket siç ndodhi me Drejtorin e  Shkollës, Reshat Elezi, të cilit Polic Pjerini i kërkon ta bëjë publike votën.

Ja se çfarë thotë Polic Pjerini i cili ndonëse ka kohë që e ka heqë uniformën është më i trashë se sa në kohën kur i shërbente Kryeministrit Ilir Meta:

“Përgjimet janë indicie por jo prova. Megjithatë meqë është përmend emri im, jam i detyruar t’u them se komunikimi im s’ka të bëjë me shit blerje, por me votat e një socialisti i cili normalisht duhet të votojë partinë e vet. Është komunikim normal me strukturat tona. As nuk është i PD as i LSI që të quhet presion. Nëse nuk lejohet t’u kërkohet vota nga ne socialistëve, atëherë është tjetër gjë.
Përgjimi është një flluskë sapuni se u nis si shitblerje dhe u katandis në telefonata pune normale me socialistët. Drejtorit të shkollës i lejohet ligjërisht të jetë pjesë e strukturat politike për ato që nuk e dinë këtë gjë dhe të votojë partinë ku aderon!”

Por çfarë thonë përgjimet ku flet deputeti Pjerin Ndreu me Drejtorin e Arsmit në Qarkun e Dibrës, Drini Gjecin:

Pjerin Ndreu: Mirëmëngjes
Drini Gjeçi: Mirëmëngjes
Pjerin Ndreu: Pjerin Ndreu jam. Si je?
Drini Gjeçi: Po Pjerin. Si kalove?
Pjerin Ndreu: A je mirë? Si ke qenë?
Drini Gjeçi: Mirë.
Pjerin Ndreu: Bëj një telefon atij Reshat Elezit, nga Reçi. Thuaj drejtorit të shkollës me deklaru votën hapur, se ato sms që i çon poshtë e përpjetë nuk janë të mira. Thuaj atij të deklaroj hapur se do të votojë për Partinë Socialiste se përndryshe të hënën tregoja vetë ku fluturon.
Drini Gjeçi: Reshat Elezaj?
Pjerin Ndreu: Po
Drini Gjeçi: Po do flas unë tani me të
Pjerin Ndreu: Tregoji ku fluturon të hënën. Thuaj të deklarojë votën për Partinë Socialiste aty, ta deklarojë hapur për PS ose ndryshe të gjej vend të futet.
Drini Gjeçi: Mos u shqetëso se do e mbaroj unë atë punë.

Ndoshta gjithçka do të qëndronte në komunikimin mes dy socialistëve, por zbatimi i urdhërit nga Drejtori i Arsimit Drini Gjeçi dëshmon se PPSH ka ndërruar emrin në PSSH por ka ngelë po ajo parti kriminale që ishte:

Drejtori i shkollës: Alo, mirëmengjes drejtor.
Drini Gjeci: Mirë, ku je ti?
Drejtori i Shkollës: Jam këtu, në radhë tek qendra e votimit.
Drini Gjeci: E ke marrë gjithë familje me vete?
Drejtori i Shkollës: Të shtëpisë? Jo ata nuk janë tu ardh me votu tani, ma vonë. Do shkoj t’i marr më vonë. Drini Gjeci: Në ça qendre voton ti?
Drejtori i Shkollës: Këtu në Zallreç.
Drini Gjeci: Zallreç? Dëgjo, se kam informacione jo të mira andej unë. Sot vota jote një dhe e familjes dy do deklarohet haptas. Nuk ke deklaruar votë haptas sot bashkë me familjen, shko dhe gjej punë tjetër.
Drejtori i shkollës: Drejtor, mos e vri mendjen për atë punë fare. Më dëgjon. Janë llafe njerëzit, mos e vri mendjen për atë punë fare.
Drini Gjeci: Ore, do deklarohet haptas, haptas! Kur them haptas, haptas. Drejtori i shkollës: Po mo e vrit mendjen fare. Pa merak, pa merak.
Drini Gjeci: Bëje haptas me gjithë familjen.
Drejtori i shkollës: Pa merak, pa merak, pa merak. Në rregull.

Kjo pro është ajo që Polici Pjerin e quann normale ashtu si edhe largimin nga puna të Drejtorit të Shkollës, Reshat Elezi, ashtu siç kishte premtuar Pjerini:

“Tregoji ku fluturon të hënën. Thuaj të deklarojë votën për Partinë Socialiste aty, ta deklarojë hapur për PS ose ndryshe të gjej vend të futet.”