Kërcënohet me jetë gazetari Osman Stafa, Berisha: Nga mafiozë qeveritarë, Edi Rama do mbajë përgjegjësi

Dënojmë me forcë kërcënimin me jetë të gazetarit Osman Stafa nga mafiozë qeveritarë, tha Kryetari i Partisë Demokratike, Sali Berisha, duke theksuar se ishte Osman Stafa ai i cili provoi se regjimi i Ramës ka kryer krime kundër njerëzimit në Spitalin Onkologjik.

Duke e vlerësuar si një klimë në narkoshtet, të cilës i prin, e frymëzon dhe e udhëheq Edi Rama, Kryetari i Partisë Demokratike i kërkoj që me urgjencë të gjejë autorin që ka kërcënuar gazetarin Osman Stafa.

“PD denoncon dhe dënon me forcën më të madhe kërcënimin me jetë nga mafiozë qeveritarë apo të lidhur me shtetin, të gazetarit Osman Stafa, i cili ndodhet i pranishëm në këtë sallë.
Kërcënimi i gazetarit Osman Stafa, vjen vetëm një muaj pasi mafia më e rrezikshme e Europës, mafia e Edi Ramës, i vendosi minën gazetarit të njohur italian, Ranuçi, për emisionin e tij kundër mafies shqiptare.
Osman Stafa, me investigimet e tij, ka provuar para shqiptarëve dhe mbarë Europës se regjimi i Edi Ramës në Spitalin Onkologjik ka kryer krime kundër njerëzimit.
Se të sëmurët, me sëmundje neoplazike, janë privuar nga ilaçet jetike në betejën e tyre me sëmundjet.
Se të sëmurët me këto sëmundje, janë privuar nga aparaturat e domosdoshme të diagnozës dhe mjekimit të këtyre sëmundjeve.
Se këto qëndrime, që tejkalojnë çdo imagjinatë, kanë kushtuar me qindra e qindra vite jetë të këtyre të sëmurëve të marrë së bashku.
Edi Rama është kryeministri i parë që pohon publikisht se ilaçet nuk i siguruam sepse të sëmurët me këtë sëmundje ishin shumë.
Nuk ka deklaratë më cinike, më çnjerëzore se sa një deklaratë e tillë.
Të pretendosh se një shtet, që në 12 vite administron 67 miliardë euro buxhete, të deklarojë se nuk ka ilaçe se të sëmurët janë shumë, është absolutisht si të firmosë me dorë dënimin e tyre kapital.
Është papërgjegjshmëri ekstreme dhe krim kundër njerëzimit.
Dhe, duhet të them këtu, se në investigimet e tij, Osman Stafa ka faktuar se në shumë raste kanë qenë vjedhjet dhe abuzimet për interesa mafioze pasurimi, të atyre që kanë plaçkitur, kanë bërë tenderin dhe nuk kanë sjellë një ilaç të vetëm, drejtorë kryesorë të spitalit dhe ministra,” tha Sali Berisha duke vlerësuar se krimi më i shëmtuar i 32 viteve ka ndodhur në Spitalin Onkologjik!

:Kanë ndodhur krime të rënda në 32 vjet, por unë garantoj shqiptarët se krimi më i shëmtuar i 32 viteve ka ndodhur në Spitalin Onkologjik.
Nuk kanë munguar ilaçet, nuk është e vërtetë, edhe njëherë e them, nuk kanë munguar në mënyrë absolute më përpara ilaçet.
Jo, nuk bëhej fjalë.
Do sillej çdo ilaç i domosdoshëm për jetën.
U informoj që jo ilaçet për këtë sëmundje, por qeveria më parë ka sjellë të rimbursueshme Ekszaden, një preparat që përdoret tek të sëmurët me talasemi, i cili i shpëton ata nga përdorimi i injeksioneve të vazhdueshme në bark.
Pra, Ekszade nuk ishte një ilaç jetik, por ishte një ilaç që ndryshonte shumë jetën e djemve dhe vajzave të reja.
Ishte jashtëzakonisht i kushtueshëm, por e kemi marrë.
Nuk mund të konceptohej t’u thuhej të sëmurëve se nuk blejmë dot ilaçet bazë të mjekimit të këtyre sëmundjeve.
Përveç kësaj, kjo dramë e tmerrshme që është luajtur dhe zhvilluar në pavijonet e Spitalit Onkologjik, ka edhe një shkak të dytë. Mafia Nushi-Doshi që ngërtheu të gjithë tregun, përzuri një nga një të gjitha kompanitë e mëdha evropiane dhe botërore që kishin zyrat në Shqipëri për produktet e tyre, në kohën kur ligji nuk lejonte tregtimin e asnjë ilaçi që nuk tregtohej në dy vende anëtare të BE.
Pikërisht për të pasur siguri të plotë në veprimet e tyre.
Pushtimi i tregut farmaceutik nga këta dy mamuthë, të lidhur kokë e palcë me Edi Ramën që të dy, bënë që kompanitë e mëdha prodhuese të ilaçeve kundër sëmundjeve malinje, të largohen njëra pas tjetrës nga Shqipëria, çka i la këta të sëmurë në mëshirën e fatit dhe sot jetëgjatësia e tyre në Shqipëri është të paktën 60-70 përqind më e ulët se në vendet e tjera ku mjekohen.
Për të mos thënë raste kur u janë dhënë ilaçe tjetër për tjetër,” tha Kryetari i Partisë Demokratike ndërsa siguroi se Edi Rama do mbajë përgjegjësi për çdo kërcënim ndaj gazetarit Osman Stafa!

“Ndaj e paralajmëroj Edi Ramën se çdo kërcënim dhe çdo shqetësim që mund t’i krijohet gazetarit Osman Stafa, do mbahet ai vetë direkt përgjegjës.
Të gjejë me shpejtësi autorin e kërcënimit.
Kjo klimë kërcënimi ndaj gazetarëve është element kryesor i narko-regjimit.
Mos harroni se një koleg i juaj u rrëmbye në mes të bulevardit nga Altin Troplini, nga Poja i Skapit, që flet sot në Durrës. Thuaju durrsakëve pse e mbajte në xhep mandat-arrestin e Elvis Doçit?
Se pashë një titull që po fliste në Durrës.
Ndjek Edi Ramën me klimë terrori ndaj gazetarëve. Rrëmben gazetarin në mes të bulevardit apo në kafene pse kishte video për Edi Ramën në dokumentet e tij.
Dhe në çdo dalje do thoshte që kemi presione dhe rreshtonte edhe gazetarët për presione.
Cili gazetar të ka bërë presion për një kriminel ty?
Apo e quan presion kur denoncojnë lidhjet e tua me krimin? Dhe këto i quajnë presione ata.
Pra, një klimë mafioze. Të njëjtën gjë ka bërë me Lapsin. Kur Lapsi publikoi të dhënat, listën e patronazhistëve, shtiu hanxharët e tij të krimit mbi Lapsin,” tha Kryetari i Partisë Demokratike, Sali Berisha, ndërsa përfundoi:
“Pra, kjo është një klimë në narkoshtet dhe kësaj klime i prin, e frymëzon, e udhëheq Edi Rama.
Ndaj dhe i kërkoj me urgjencë të gjejë autorin që ka kërcënuar gazetarin Osman Stafa.
Se për Ranuçin po e gjejnë, u arrestua në Dubai ai, Sinomati, por Antimafia Italiane është tjetër dhe pritet të zbardhet e gjithë skema se si u kërcënua, si u hodh në erë makina e gazetarit kur aty afër po kalonte vajza e tij.”