Kërcënohet Presidentja e Kosovës: “Trutë në tokë t’i kisha qitë!”

Shefi i stafit të U.D. Presidentes së Kosovës, Faton Peci, ka bërë publik kërcënimin që i është bërë Vjosa Osmanit përmes rrjetit social, shoqëruar dhe me një armë të gjatë: “Trutë në tokë t’i kisha qitë!”

Kërcënimi është bërë në profilin e Vjosa Osmanit tha Peci duke vlerësuar se kjo ka tejkaluar nivelin e kërcënimeve:

“Fushata e egër kundrejt u.d. presidentes ka që një kohë të gjatë që po përcillet edhe me kërcënime me jetë. Të gjithë ata që po tentojnë t`i drejtojnë shtizat kah ajo, në fakt po i kthejnë kah vetja. Zonja Osmani është politikane që e ka kapërcyer stadin e kërcënimeve dhe tendencave për denigrim,” thekson Faton Peci në reagimin e tij duke përfunduar:

“Zonja Osmani për qytetarin e thjeshtë është personifikim i guximit e konsistencës, ndaj çfarëdo përpjekje për ta frikësuar apo kërcënuar është e kotë! Ajo ende guxon dhe sërish do të guxojë!”

Ndryshe, një kërcënim të ngjashëm ka pasur edhe Ish-Presidenti i Kosovës, Hashim Thaçi, por për dallim nga rasti i Vjosa Osmanit, kërcënuesi i Thaçit ishte arrestuar dhe kishte kërkuar falje, por ishte gjobitur 2.500 euro nga gjykata.