Kërkesa në Parlament, SPAK do të arrestojë Arben Ahmetajn, ja akuzat…
Sot Prokuroria e Posaçme Kundër Korrupsionit dhe Krimit të Organizuar, SPAK, ka kërkuar nga Parlamenti i Shqipërisë lejen për arrestimin e Ish/ZvKryeministrit Arben Ahmetaj.
“Pak minuta më parë në Kuvendin e Shqipërisë është protokolluar kërkesa e SPAK që kërkon lejen për arrestimin e Ahmetajt për shkak të imunitetit të deputetit.
Ndaj tij janë ngritur tre akuza penale, korrupsion pasiv, pastrim parash dhe deklarim i rremë dhe fshehje pasurie. Për këto akuza është kërkuar dhe arrestimi i tij. Bashkë me lejen për arrestimin është dhe ajo për kontrollin personal dhe të celularëve të tij,” raporton BW, pasi SPAK kishte vepruar me kontrollin e dy banesave, të partneres së Arben Ahmetajt në Hamallaj dhe një vilë në zonën e Palasës që mendohet se disponohet nga ish-bashkëshortja e Ahmetaj. Të dy pasuritë janë sekuestruar nga SPAK dhe ka pasur një përballje të tij me drejtësinë që e kundërshtonte këtë kontroll dhe sekuestro, sidomos për banesën në Hamallaj ku jetonte me bashkëjetuesen Erjola Hoxha.
Tashmë pritet të mblidhet Këshilli i Mandateve dhe në qoftë se Ahmetaj do të vijojë ta mbajë imunitetin e deputetët, prokurorët e posaçëm do të paraqiten para komisionit në Parlament për të paraqitur provat e tyre. Pritet të dëgjohet dhe vetë Ish/ZvKryeministri Arben Ahmetaj, dhe është seanca ajo që do të vendosë nëse do të arrestohet Arben Ahmetaj.
Ndryshe, afera e inceneratorëve jo vetëm që i ka shkaktuar një dëm të madh buxhetit të shtetit, por tronditi dhe mazhorancën socialiste të Edi Ramës pasi u konstatuan implikime të zyrtarëve të lartë, ministrave dhe deputetëve, përveç se tre biznesmenëve të inceneratorëve, Mirel Mërtirin, Stela Gugalljan dhe Klodian Zoton, që deri më tani SPAK ka vënë nën akuzë dhe ka kërkuar dënime.
Akuzat e SPAK ndaj Ish/ZvKryeministrit Arben Ahmetaj me të cilat i është drejtuar Parlamentit ku kërkon lejen për arrestimin e tij
Prokuroria e Posaçme Kundër Korrupsionit dhe Krimit të Organizuar, ka regjistruar procedimin penal Nr. 277/1 të vitit 2022 për veprat penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, “Korrupsionit pasiv të funksionarëve të lartë shtetërorë ose të zgjedhurve vendorë”, “Korrupsioni aktiv i funksionarëve të lartë shtetërorë ose të zgjedhurve vendorë”, “Pastrimit të produkteve të veprës penale ose veprimtarisë kriminale”, parashikuar respektivisht nga nenet 257/a, 260, 245, 287 të K.Penal.
Mbështetur në nenin 73 të Kushtetutës së Republikës së Shqipërisë, nenin 288 të K.Pr.Penale, si dhe në Rregulloren e Kuvendit të Republikës së Shqipërisë, nenet 13 dhe 118, në kuadrin e procedimit penal të mësipërm, ka paraqitur kërkesën për dhënien e autorizimit nga Kuvendi i Republikës së Shqipërisë, për arrestimin/heqjen e lirisë dhe ushtrimin e kontrollit personal dhe të banesës së deputetit Arben Ahmetaj, datëlindja 28.06.1969, lindur në Gjirokastër.
Ky shtetas, rezulton se ka marrë cilësinë e personit nën hetim, në kuadrin e procedimit penal nr. 277/1 të vitit 2022, pasi dyshohet se ka kryer veprat penale të:
• “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, vetëm dhe në bashkëpunim, në formën e deklarimit të rremë, dhe në formën e fshehjes, parashikuar nga neni 257/a paragrafi i dytë, neni 25 i K.Penal,
• “Korrupsionit pasiv të funksionarëve të lartë shtetërorë ose të zgjedhurve vendorë” parashikuar nga neni 260 i K.Penal, 6 (gjashtë) herë;
• “Pastrimit të produkteve të veprës penale ose veprimtarisë kriminale”, në bashkëpunim, më shumë se një herë, parashikuar nga neni 287 paragrafi i dytë i K.Penal.
