Kërkesat e prodhuesve shqiptarë, Basha: Përmbushja, shmang katastrofën ekonomike!
Ndonëse kërkesat konkrete për të përballuar krizën gjatë pandemisë janë bërë publike qysh herët nga Përfaqësuesit e Shoqatës së Bashkimit të Prodhuesve Shqiptarë, sot në takim me Kyetarin e Partisë Demokratike, Lulzim Basha, u konstatua se si me këto kërkesa ashtu dhe shqetësimet e tyre për ecurinë e mëtejshme të aktivitetit pas pamdemisë COVID-19, qeveria nuk ka marrë asnjë masë konkrete për t`u ardhur në ndihmë.
Përfaqësuesit e Shoqatës së Bashkimit të Prodhuesve Shqiptarë shprehën shqetesimin e thellë për uljen e ndjeshme të prodhimit dhe të eksporteve, por edhe për humbjen e vendeve të punës, faktorë që kanë prekur pjesën dërrmuese të bizneseve prodhuese.
“Paketat ekonomike të qeverisë nuk e kanë ndihmuar aspak këtë sektor që çdo ditë e më shumë po varfërohet dhe rrënohet nga pandemia e krizës ekonomike. Mungesa e likuiditetit në zinxhirin prodhues shoqëruar dhe me mungesën e aksesit në garancinë sovrane e ekspozojnë sektorin e prodhimit shqiptar ndaj rrezikut nga falimentimi, çka do të çojë në largimin e mijëra shqiptarëve nga puna,” u shpreh Lulzim Basha pas takimit me Përfaqësuesit e Shoqatës së Bashkimit të Prodhuesve Shqiptarë me të cilët ndau shqetësimin e thellë se sot ka shumë qytetarë që nuk kanë marrë asnjë lek ndihmë nga qeveria. Shumica e bizneseve nuk kanë përfituar asnjë ndihmë dhe po detyrohen të mbyllen dita-ditës.
“Qeveria dështoi në menaxhimin e krizës që erdhi nga pandemia, duke u shkaktuar një dëm të madh shqiptarëve dhe duke vepruar vetëm në favor të klientëve të saj. Rama ka paguar gjithsej rreth 40 milionë euro për shqiptarët, ndërkohë që po kaq ai ju ka paguar me nje dorë vetëm për 2 km rrugë klientëve të tij tek Unaza e Re,” tha Kryetari i Partisë Demokratike, Lulzim Basha, përmes rrjetit social Facebook duke i konsideruar të drejta shqetësimet e ngritura nga Bashkimi i Prodhuesve Shqiptarë ndërsa përfundoi:
“PD është në krah të biznesit e në mbështetje të kërkesave të tyre legjitime. Përmbushja e këtyre kërkesave është rruga për të shmangur katastrofën ekonomike dhe papunësinë pasojat e së cilës janë të papërballueshëm për njerëzit.”
