Kërkesë gjykatave, Rama: Zjarrvënësit të kalben në burg, të shërbejnë si mesazh!
Sot Kryeministri Edi Rama duke shprehur ngushëllime fëmijëve të dy prindërve, që humbën tragjikisht jetën nga zjarri në Gjirokastër, në ceremonisë falënderuese për menaxhimin me sukses të vatrave të zjarreve në vend, vlerësoi punën e zjarrfikësve dhe forcave të ushtrisë, që u përballën me shumë vatra zjarri.
Për të gjithë anëtarët e Mbrojtjes Civile dhe efektivët e Forcave të Armatosura, që vendosin në rrezik jetën e tyre për të mbrojtur vendin, kishte një lajm të mirë ku tha se do t’u rriten pagat ndërsa për zjarrvënësit tha se meritojnë të kalben prapa hekurave dhe shpreson që gjykatësit të jenë në lartësitë e dhimbjes për kaq shumë vlera natyrore të dëmtuara dhe aq shumë pemë, burime jete të shkatërruara dhe t’u japin vendimet e duhura.
“Shpreh ngushëllimet publikisht të dy djemve që humbën prindërit, në tragjedinë e tyre familjare, për shkak të zjarrit. Po ashtu, dua t’i shpreh të gjithë mirënjohjen e respektin të gjithë atyre që u angazhuan në një muaj zjarri, sepse i tillë ishte muaji gusht, dhe manifestuan një ndjenjë të lartë sakrifice e përkushtimi. Këtu kam parasysh pa përjashtim të gjitha forcat e angazhuara në terrenet jashtëzakonisht të vështira, forcat e Armatosura, ato zjarrfikëse, policore, bashkiake, vullnetare, ato të administratës të zonave të mbrojtura, të shërbimeve pyjore, si dhe ata që mbështetën të gjithë këtë përpjekje, me ambulancat e urgjencës kombëtare.
Ajo që mbetet sot është nga njëra anë fuqia e jashtëzakonshme e shembullit të të gjithëve, dhe nga ana tjetër, nevoja për të çuar përpara në një proces modernizimi mbrojtjen tonë civile. Dua të them me bindjen se çka kemi parë deri tani, si rezultat i reformës së gjithë sistemit të emergjencës civile, është shumë inkurajuese, për të parë me optimizëm rezultatin përfundimtar të këtij procesi.
“Ishte një muaj zjarresh, që përfshiu botën dhe vuri në një pozitë të vështirë vende të afërta, të cilat janë mësuar me sfidën e zjarreve dhe këtë vit, për herë të parë, që kur unë e mbaj mend, nuk kishin asnjë mundësi të na jepnin asnjë ndihmë, por kishin nevojë për ndihmë. Këtu kam parasysh Italinë, Turqinë, Greqinë. Janë tre vende me struktura të jashtëzakonshme të mbrojtjes civile, me eksperiencë të madhe e shumë plagë nga zjarret. Janë tre vende që i janë gjendur Shqipërisë gjithmonë, por këtë herë e kishin absolutisht të pamundur. Ata kishin nevojë vetë për ndihmë,” tha Rama duke falënderuar ambasadorët e BE dhe SHBA, Luigi Soreca dhe Yuri Kim, që iu gjendën pranë vendin tonë në këtë muaj, duke ofruar edhe ndihmë:
“Nuk është e rastësishme që BE ka ngritur një mekanizëm të brendshëm për të asistuar shtetet që janë në emergjencë. Katastrofat e natyrës nuk i përballon dot askush i vetëm. Unë i shpreh një falënderim të posaçëm sot ambasadorit të BE, ambasadores së SHBA. Dua sot të them se ky falënderim nuk është as formal, as diplomatik. Madje nuk është as një falënderim për dy ambasadorë, por është një falënderim për dy përfaqësues të dy fuqive të mëdha, që janë edhe aleatët strategjikë të vendit tonë, që për hir të së vërtetës, sa herë që Shqipëria ka nevojë, janë më shumë se sa ambasadorë, janë qytetarë të këtij vendi dhe njerëz që shqetësohen menjëherë për këtë vend dhe menjëherë vihen në dispozicion për të ndihmuar. Përtej hierarkisë dhe marrëdhënies diplomatike, unë sot dua të falënderoj edhe Luigi, edhe Yuri, që gjatë gjithë gushtit kanë qenë vijimësisht të vëmendshëm dhe të interesuar për të mësuar se si shkoi dita, qoftë për të thënë në fillim të ditës se ‘çfarë do të bëjmë sot’. Edhe prania këtu e ambasadorëve të Holandës dhe Republikës Çeke është simbol i kësaj fryme solidariteti për ditët më të vështira të BE dhe SHBA. I falënderoj që të dy për ndihmën vendimtare që dhanë, duke vënë në dispozicion për fikjen e një numër marramendës vatrash zjarri nëpër Shqipëri disa mjete speciale, që e lehtësuan shumë punën e trupave tona në terren,” tha Kryeministri i Shqipërisë pa harruar një falënderim të veçantë edhe për ministrin e Mbrojtjes, Niko Peleshi :
“Dua të falënderoj specifikisht ministrin, sepse ka nderuar qeverinë në këtë muaj jashtëzakonisht sfidues, duke qenë ditë-natë pranë trupave, duke u gdhirë në jug e duke u ngrysur në veri. Kemi qenë në kontakt permament. Me forcën e shembullit të tij jam i bindur që ka frymëzuar edhe drejtuesit e tjerë dhe jam i bindur që ky është modeli që të gjithë ne kemi detyrimin të kemi parasysh, sa herë që sfidat bëhen të atilla, që i vënë njerëzit në pozitën e nevojës për një energji më shumë, për një fuqi më shumë apo për një motivim më shumë. Kur shohin autoritetet apo titullarët të jenë aty, sfida e tyre bëhet më e lehtë. Por, rolin thelbësor e kanë të gjithë ata që janë nën uniformë, që arriti të shpëtojë jetë njerëzish dhe të parandalojë përmasa katastrofike të kësaj vere dhe të këtij gushti krejt sfidues.”
Për zjarrvënësit ai tha se shumë prej tyre janë identifikuar dhe arrestuar ndërsa kërkoi nga gjykata që t’i japë një dënim shembullor, që fenomene të tilla të mos përsëriten më në të ardhmen.
“Ne do të bëjmë atë që duhet për të rritur edhe pagën, që nuk do të jetë asnjëherë e mjaftueshme, sepse nuk është e mjaftueshme askund, kur cilido që i përket këtyre trupave përballet me një sfidë që kërcënon jetën e tij, por si gjithmonë një motiv më shumë, jo vetëm për të çuar në shtëpi më shumë të ardhura të merituara nga puna, por për të ndjerë vlerësimin për punën që bën. Nuk dua të zgjatem më tutje, por s’rri pa theksuar aspektin kriminal të gjithë këtyre vatrave të zjarrit, të cilat në një pjesë të madhe janë rezultat i rritjes dramatike të temperaturave kudo në botë, por në një pjesë të konsiderueshme janë rezultat i barbarisë të atyre që me një shkrepëse, një shishe benzinë, vrasin shpirtin e atdheut, plagosin trupin e atdheut dhe hedhin në erë mundimet, djersën, përkushtimin e shumë gjeneratave duke privuar nga qoftë edhe një qelizë e mushkërive të gjelbërta të këtij vendi, fëmijët e këtij vendi. Më vjen mirë që Policia e Shtetit ka arritur të çojë prapa hekurave një numër jo të vogël barbarësh, që nuk meritojnë të jenë të lirë mes qytetarëve të lirë të këtij vendi, meritojnë të kalben prapa hekurave. Shpresoj që gjykatat të japin vendimet e duhura dhe shpresoj që gjykatësit të jenë në lartësitë e dhimbjes për kaq shumë vlera natyrore të dëmtuara dhe aq shumë pemë, burime jete të shkatërruara.”
Këto nuk janë pasuria e askujt individualisht, tha Kryeministri duke shtuar:
“Ata janë pasuria jonë, thesari që ne duam t’ia trashëgojmë fëmijëve tanë, edhe gjykatësit. Këta kriminel barbarë, jo vetëm të kalben në burg, por të shërbejnë për t’i dhënë një mesazh të qartë. Është e patolerueshme që ndryshimet e klimës në vetvete përbën potencial të lartë për zjarre, dora e njeriut të shtojë nga vetja, për të vënë para një sfide marramendëse të gjithë këta prindër, për të vënë përpara kësaj sfide të gjithë këta bij e bija të këtij vendi, e për të ndezur zjarre që shkojnë deri aty që marrin jetë. Për fat të mirë, falë trupave janë shpëtuar jetë. Një tragjedi si ajo që përmendëm me humbjen e dy prindërve është shumë e madhe. Parafytyrimi që mund të kishin qenë shumë më tepër sesa kaq, e bën revoltën shumë më të madhe,” tha Kryeministri Edi Rama duke përfunduar:
“Disa nga autoritetet vendore u ka shkëlqyer me përkushtimin dhe me gatishmërinë e tij Perfekti i Vlorë, por jo vetëm. Të gjithë duhet të ndihen sot krenarë për atë që kanë bërë. Unë ndihem i përulur për faktin që ne na takon të bëjmë më tepër për të gjithë ju.”
