Kërkim-zhvillimi, Shqipëria me nivelin më të ulët të shpenzimeve në Europë

Shqipëria mbetet ndër vendet me shpenzimet më të ulëta për kërkim-zhvillim, R&D, në rajon, duke alokuar vetëm 0.20 për qind të PBB-së për inovacion, nivel pothuajse identik me Bosnjën 0.19 për qind, sipas të dhënave që janë bërë publike nga Eurostat, për vitin 2024, ose viti më i afërt kur janë informacionet.

Në kontrast, Serbia investon 0.93 për qind të PBB-së dhe Maqedonia e Veriut 0.36 për qind, duke treguar një angazhim më të lartë ndaj zhvillimit teknologjik dhe modernizimit ekonomik.

Niveli i ulët i financimit në Shqipëri kufizon rritjen e produktivitetit, inovacionin dhe transformimin e modelit ekonomik, duke e bërë më të vështirë për vendin të konkurrojë me ekonomitë e tjera në zhvillim.

Ndërkohë, panorama europiane paraqet një kontrast të fortë. Sipas Eurostat, mesatarja e Bashkimit Europian në këtë tregues është 2.24 për qind e PBB-së, pjesa më e madhe e të cilit, rreth 67 për qind vjen nga shpenzimet për kërkim dhe zhvillim të bizneseve, 1.49 për qind e PBB-së.

Në Shqipëri, bizneset investojnë vetëm 0.07 për qind të PBB-së për kërkim e zhvillim. Investimet e bizneseve përbëjnë vetëm 35 për qind të totalit të shpenzimeve për kërkim zhvillim në vend, shumë më poshtë se mesatarja europiane.

Europa

Vendet e Bashkimit Europian vazhdojnë të investojnë shumëfish më tepër në kërkim dhe inovacion, duke i konsideruar shpenzimet për R&D një shtyllë themelore të rritjes afatgjatë.

Në BE, shumë shtete anëtare shpenzojnë mbi 2 për qind të PBB-së për kërkim-zhvillim, duke krijuar një diferencë të dukshme midis ekonomive të zhvilluara dhe vendeve të Ballkanit Perëndimor.

Vendet nordike, si Suedia, Danimarka dhe Finlanda, mbeten në krye të renditjeve, duke kombinuar investimet publike dhe private me traditën e forte universitare dhe industriale.

Ekonomitë e mëdha, si Gjermania, kontribuojnë në vlerë absolute me buxhete të konsiderueshme për teknologji, inovacion dhe shkencë, ndërsa vendet e Europës Lindore kanë rritur gradualisht investimet për të afruar standardet e BE-së dhe për të modernizuar sektorët e tyre prodhues.

Sipas Eurostat, në vitin 2024, 6 vende të BE-së regjistruan një intensitet të shpenzimeve për R&D të barabartë ose më të lartë se 3 për qind, objektivi i BE-së i vendosur nga Këshilli Europian. Intensiteti më i lartë i R&D-së u regjistrua në Suedi 3.6 për qind, Belgjikë 3.4 për qind, Austri 3.3 për qind dhe Finlandë 3.2 për qind, të ndjekura nga Gjermania 3.1 për qind dhe Danimarka 3.0 për qind.

Në të kundërt, 7 vende të BE-së raportuan një intensitet të shpenzimeve për R&D më të ulët ose të barabartë me 1 për qind: Rumania dhe Malta nga 0.5 për qind secila, Qipro 0.7 për qind, Bullgaria 0.8 për qind, Letonia 0.9 për qind, si dhe Sllovakia dhe Luksemburgu 1.0 për qind.

67% e shpenzimeve për R&D vijnë nga sektori i biznesit

Sektori i ndërmarrjeve private vazhdoi të përbëjë pjesën më të madhe të shpenzimeve për kërkim dhe zhvillim në vitin 2024. Ai zuri 66.5 për qind të totalit të shpenzimeve të BE-së për R&D, duke arritur në 268.1 miliardë euro. Pas tij renditet sektori i arsimit të lartë, 86.1 miliardë euro;ose 21.4 për qind, sektori qeveritar 43.5 miliardë euroose 10.8 për qind dhe sektori jofitimprurës privat 5.4 miliardë euro pse 1.3 për qind.

Komisioni Europian ka nënvizuar vazhdimisht lidhjen e drejtpërdrejtë mes investimeve në R&D dhe fuqisë konkurruese të ekonomive të BE-së.

Sipas të dhënave të Eurostat, vendet që shpenzojnë më shumë për kërkim kanë produktivitet më të lartë, sektorë teknologjikë më të zhvilluar dhe një aftësi më të madhe për të tërhequr investime të huaja. Kjo politikë ka bërë që BE-ja të synojë rritje të vazhdueshme të shpenzimeve për R&D dhe të shtyjë sektorin privat të marrë një rol më aktiv në financimin e inovacionit.

Të dhënat tregojnë se Shqipëria është dukshëm prapa, duke rrezikuar të mbetet e shkëputur nga trendet teknologjike që po transformojnë ekonominë europiane. Hendeku mes vendeve të BE-së dhe rajonit sa vjen e zgjerohet, ndërsa vendet me investime më të larta në R&D po rrisin pozicionin e tyre konkurrues./Monitor/