KESH: Rriten nivelet e liqeneve në tre HEC-et, pritet vendim për shkarkimet

Korporata Elektroenergjetike Shqiptare, KESH, bëri të ditur se reshjet e shiut me intensitet të lartë gjatë orëve të fundit, në ujëmbledhësin e kaskadës së lumit Drin kanë rritur nivelet e liqeneve në Hidrocentralet e Koman dhe Vau i Dejës si dhe HEC Fierzë.

Nisur nga kjo situatë Administratori i KESH, Benet Beci ka thirrur sot në një takim Sekretariatin Teknik të Komisionit te Posaçëm të Trajtimit të Plotave, për trajtimin e prurjeve natyrore në kaskadë, në përputhje me Rregulloren e shkarkimit të Plotave.

Sekretariati Teknik dhe Komisionit të Posaçëm të Trajtimit të Plotave u njoh me situatën aktuale e dhe pritet që në ditët në vijim të marrin një vendim.

Aktualisht prurjet natyrore në kaskadë janë 3600 m3/s, ndërkohë që shkarkimet nga porta e Hec Vau i Dejës janë 700 m3/s dhe në HEC Koman 400 m3/s.

Nivelet në liqenet e Kaskadës së Drinit janë aktualisht:

-Fierza 286.09 mmnd,

-Koman 173.30 mmnd,

-Vau i Dejës 75.54 mmnd.

Ndërkohë, KESH njofton se të vijojë të marrë të gjitha masat e nevojshme për të menaxhuar situatën duke garantuar sigurinë e plotë të digave dhe shmangien e ndikimit negativ të shkarkimeve në zonën e nën-Shkodrës./Monitor/