Këshillë për Sorensen dhe BE, Hovenier: Mos negocioni zotime të reja!
Ish-Ambasadori amerikan në Kosovë, Jeffrey Hovenier, duke folur për për Atlantic Council mbi rezultatet e zgjedhjeve dhe sfidat që ka përpara Kosova, këshillon Të dërguarin e ri të BE për dialogun Kosovë-Serbi, Peter Sorensen dhe vetë Bashkimin Evropian që mënyra më e mirë për të ecur përpara është të mos negociojnë zotime të reja.
“Rezultati i zgjedhjeve tregoi se Vetëvendosje ka mbajtur pozicionin e saj si partia më e votuar, por pa arritur numrat për krijimin e qeverisë si e vetme. Kjo është një situatë më normale në krahasim me zgjedhjet e 2021, kur Vetëvendosje fitoi shumicën absolute. Koalicionet politike janë një realitet i gjatë në Kosovë dhe formimi i një qeverie të re do të kërkojë negociata të ndërlikuara,” tha Hovenier për Atlantic Council Hovenier duke shtuar se kushdo që merr drejtimin e qeverisë duhet të përmbushë zotimet nga dialogu me Serbinë, pjesë e të cilit është edhe Asociacioni i Komunave me shumicë serbe.
“Kosova ka një obligim për të zbatuar marrëveshjen për Asociacionin e Komunave Serbe, një çështje që ka qenë burim i tensioneve me aleatët perëndimorë. Kosova u zotua për këtë marrëveshje që në vitin 2013 dhe se ky obligim nuk ka ndryshuar.
Ka edhe zotime që ka marrë edhe Serbia, gjëra që duhet të bëjë, të cilat gjithashtu duhet të zbatohen. Ky zotim në lidhje me Asociacionin u përsërit fuqishëm në kontekstin e Marrëveshjes Bazike të 2023-ës dhe Aneksit të Zbatimit të saj,” tha Hovenier ndërsa kishte një këshillë për Peter Sorensen dhe Bashkimin Evropian:
“Mënyra më e mirë për të ecur përpara është të mos negociosh zotime të reja tani, sepse ajo që u arrit në vitin 2023 është një paketë mjaft mbresëlënëse. Thjesht mungon plotësisht në zbatim. As Kosova dhe as Serbia nuk i kanë marrë seriozisht obligimet për zbatimin e zotimeve,” tha Jeffrey Hovenier i bindur se zbatimi i marrëveshjeve ekzistuese është thelbësor për të avancuar dialogun dhe për të përmirësuar marrëdhëniet mes Kosovës dhe Serbisë.
Duke folur për marrëdhëniet mes Kosovës dhe Shteteve të Bashkuara, Hovenier theksoi se megjithëse ka pasur tensione në kohën e tij si Ambasador, dy vendet kanë mbetur të lidhura nga qëllimet e përbashkëta. Shtetet e Bashkuara dhe Bashkimi Evropian, tha Hovenier kanë qenë të përkushtuar në ndihmën e Kosovës për të avancuar drejt integrimit evropian dhe për të përmirësuar ekonominë e saj.
Në fund, Ish-Ambasadori amerikan në Kosovë, Jeffrey Hovenier, tha se mbështetja e Shteteve të Bashkuara është thelbësore për Kosovën në rrugën e saj drejt integrimit në Bashkimin Evropian dhe NATO-s ndërsa rikujtoi se vendimet në këto organizata merren me konsensus, dhe prania e mbështetjes së SHBA-së është jetike për të siguruar një progres të qëndrueshëm.
