Këshilli Bashkiak i Hasit shpall “Qytetar Nderi” atentatorin e Hajdarit/ Ja çfarë denoncoi PD…
Këshilli Bashkiak i Hasit ka shpallur me 13 vota pro dhe 1 abstenim Gafurr Mazrekun “Qytetar Nderi”. Ai është vlerësuar me motivacionin si ‘Personalitet me kontribut në pushtetin vendor’.
Partia Demokratike denoncoi pak ditë më parë aktin e ndërmarrë nga këshilltarët socialist në këtë bashki, ndërsa akuzoi Kryeministrin Edi Rama.
Mazreku, ish-deputet i PS-së, qëlloi në sallën e Kuvendit, Azem Hajdarin, duke e plagosur rëndë atë.
Për ketë veprim ai është denuar nga Gjykatat Shqiptare.
“Dy dekada pas atentatit brenda në Parlament kundër Azem Hajdarit, atentatori, deputeti i Partisë Socialiste në atë kohë, Gafurr Mazreku propozohet nga Edi Rama per t’i dhënë titullin “Qytetar Nderi”.
Partia Demokratike disponon propozimin që Kryetari i Bashkisë së Hasit i ka bërë Këshillit Bashkiak për të nderuar një vrasës si Gafurr Mazreku me titullin më të lartë që mund të japë pushteti lokal.
Nderimi i një deputeti që ka përdorur armën brenda sallës së Parlamentit kundër Azem Hajdarit është modeli që Edi Rama ka ndjekur që kur ka ardhur në pushtet.
Është modeli që nderon dhe i jep pushtet kriminelëve në parlament, qeveri dhe bashki, siç është rasti i Elvis Roshit, Mark Frrokut, Arben Ndokës dhe të tjerëve si ata.
Është modeli që mbron krimin të lidhur me qeverinë, siç është rasti i Saimir Tahirit dhe Agron e Fatmir Xhafës”, denoncoi pak ditë më parë PD.
