Këshilli i BE diskuton për dialogun Kosovë-Serbi
Ministrat e Jashtëm të BE-së do të diskutojnë për dialogun ndërmjet Kosovës dhe Serbisë në një takim më 15 nëntor në Bruksel dhe fokusi do të jetë në zbatimin e asaj që palët janë zotuar më parë në negociata.
“Fokusi duhet të kthehet në zbatimin e obligimeve ende të paplotësuara nga dialogu, duhet të përmirësohet atmosfera përmes lëvizjeve konkrete pozitive dhe të punohet në përparimin drejt një marrëveshjeje gjithëpërfshirëse për normalizim, dhe rrjedhimisht në të ardhmen evropiane të Kosovës dhe Serbisë, ” thuhet në dokumentin e përgatitur për diskutimin ministror, raporton Agjencia shtetërore serbe e lajmeve Tanjug e cila në vitet e fundit publikon Draftet që dalin nga ky dialog para se Brukseli zyrtar ti bënë publike.
Dokumenti i punës vlerëson se atmosfera e përgjithshme rreth dialogut ndërmjet Beogradit dhe Prishtinës është ende e komplikuar” dhe thekson se “nuk ka pasur përparim në muajt e fundit.
Zgjidhja e mosmarrëveshjeve për targat, thekson dokomenti të cilin Tanjug thotë se e kishte në dorë, ka treguar se dialogu mund të sjellë rezultate, veçanërisht kur mbështetet nga mesazhe të qarta nga zyrtarë të lartë të BE-së dhe partnerë ndërkombëtarë, përfshirë Shtetet e Bashkuara.
Teksti i dokumentit bën thirrje për mbështetje për përpjekjet e bëra nga ndërmjetësit e BE-së Josep Borrell dhe Miroslav Lajçak në dialog, por gjithashtu u bën thirrje vendeve anëtare që të angazhohen në një nivel të lartë me Beogradin dhe Prishtinën, thekson dokumendti duke përfunduar:
“Të dyja palët duhet të inkurajohen që të angazhohen në mënyrë konstruktive dhe të arrijnë rezultate pozitive, përfshirë marrëveshjet për tregun e përbashkët rajonal, si dhe të përmbahen nga lëvizjet e njëanshme dhe retorika e ndarjeve, veçanërisht kur bëhet fjalë për veriun e Kosovës.”
Në takimin e 15 nëntorit në Bruksel, Këshilli i BE-së do të diskutojë situatën e përgjithshme dhe angazhimin e BE-së në Ballkanin Perëndimor dhe diskutimet mbi situatën gjithnjë e më të vështirë në BeH dhe dialogun midis Serbisë dhe Kosovës.
