Këshilli i Mandateve dakord për arrestimin e Arben Ahmetaj, raporti do votohet të hënën në Parlament
Këshilli i Mandateve ra dakord që ti kërkojë Kuvendit t’i japë SPAK autorizimin që kërkon për kontrollin e banesës dhe arrestimin e ish ministrit të Financave Arben Ahmetaj.
Raporti i paraqitur sot në Këshillin e Mandateve do të miratohet të hënën në një seancë të posaçme plenare që do të mbahet në orën 17:00.
Në fillim të kësaj jave Prokuroria e Posaçme Kundër Korrupsionit, SPAK, i kërkoi Kuvendit dhënien e autorizimit për arrestimin e deputetit Arben Ahmetaj.
Ish ministri i Financave akuzohet për “Mosdeklarim apo fshehje të pasurive”, “Korrupsion pasiv” si dhe “Pastrim parash”.
Hetimet ndaj Ahmetajt nisën në vitin 2022 dhe Prokuroria e Posaçme thekson se “vazhdon hetimi në drejtim edhe të fakteve të tjera penale apo personave të tjerë të implikuar”.
Hetimet kanë të bëjnë me rolin që ka pasur Ahmetaj në tre inceneratorët e Fierit, Elbasanit dhe të Tiranës.
“Hetimet në kuadrin e procedimit penal nr. 277/1 të vitit 2022, janë shtrirë në kuadrin e parimit të një hetimi të gjithëanshëm, në rolin që ka pasur shtetasi Arben Ahmetaj, jo vetëm në kuadrin e procedurës për dhënien me koncension të projektit për ndërtimin dhe administrimin e impiantit të trajtimit të mbetjeve urbane të qarkut të Elbasanit dhe prodhimin e energjisë, por edhe në atë për ndërtimin dhe administrimin e impiantit të trajtimit të mbetjeve urbane të qarkut Fier dhe prodhimin e energjisë si dhe ndërtimin e landfillit, inceneratorit dhe rehabilitimi i venddepozitimeve ekzistuese Tiranë”, thuhet në dosjen e SPAK.
Ahmetaj ka mbajtur disa poste të rëndësishme në vend.
Në dy shtator 2021 ai u emëruar zëvendëskryeministër, pas dorëheqjes nga ky post të Erion Braçes. Njëherësh ai ishte dhe ministër Ministër i Shtetit për Rindërtimin, post të cilin e mori pas tërmetit të 26 nëntorit 2019.
Më herët ai ka mbajtur detyrën e Ministrit të Financave përgjatë periudhës shkurt 2016 – janar 2019, si dhe si Ministër i Zhvillimit Ekonomik, Turizmit, Tregtisë dhe Sipërmarrjes në periudhën shtator 2013- shkurt 2016.
Në vitet 2004- 2005 mbajti postin e Zëvendës Ministrit në Ministrinë e Integrimit Europian, ndërsa në periudhën 2003-2004 atë të Zëvendës Ministrit në Ministrinë e Energjisë dhe Industrisë.
Në vitet ’98-’99 Ahmetaj ishte Drejtor i Përgjithshëm në Drejtorinë e Përgjithshme të Tatimeve, ndërsa më herët ka shërbyer si drejtor i kabinetit në Ministrinë e Financave dhe përgjegjës për marrëdhëniet ndërkombëtare.
Në 25 korrik 2022 Ahmetaj u shkarkua nga posti i zëvendëskryeministrit dhe ministrit për Rindërtimin, pas fillimit të hetimeve nga SPAK./Monitor/
