Këshilli Kombëtar voton djegien e mandateve, Basha: Ju ftoj nesër…

Këshilli Kombëtar i Partisë Demokratike ka votuar sot unanimisht për djegien e mandateve të deputetëve të Partisë Demokratike.

Gjatë mbledhjes e cila u zhvillua në selinë e PD, mësohet se asnjë nga të pranishmit nuk është shprehur kundër propozimit të Kryetarit të Partisë Demokratike, Lulzim Basha për të bërë nul mandatet e ligjvënësve të demokrat.

Ndërkohë që pritej vendimi për konfirmimin e djegies së mandateve, dhjetëra simpatizantë të kësaj force politike në pritje të vendimit po brohorisnin për Bashën dhe vendimin të cilin pas pak çastesh Lulzim Basha do ta bëjë publik para selisë së partisë:

“Vëllezër dhe motra, qytetarë dhe qytetare të Tiranës! Demokrate dhe demokratë!

Kam nderin dhe privilegjin t’ju bëj të ditur vendimin unanim të Këshillit Kombëtar të Partisë Demokratike të Shqipërisë për djegien e mandateve parlamentare me efekt të menjëhershëm,” thekson lideri i Opozitës ndërsa sqaron:

“Vendimi i marrë sot, është vetëm fillimi i një beteje, por unë e di se këtë betejë të madhe, ne të gjithë së bashku do ta fitojmë për Shqipërinë, për demokracinë, për Europën, për Amerikën. Do ta fitojmë për të sotmen, do ta fitojmë për të nesërmen, për të ardhmen e këtij vendi.”

Në fund, ndonëse Gramoz Ruçi anuloj seancën, lideri i Opozitës, Lulzim Basha ftoj qytetarët në protestën e cilë nesër zhvillohet para Parlamentit të Shqipërisë:

“Ndaj ju ftoj, askush mos të mungojë, zonja dhe zotërinj, qytetare e qytetarë, demokratë dhe socialistë të tradhëtuar nga rilindja kriminale, në protestën e nesërme në orën 10:00 para Kuvendit të Shqipërisë i cili një orë e më parë do t’i kthehet Shqipërisë dhe shqiptarëve dhe jo krimit dhe korrupsionit.”

Ndërkohë që kryetari i Partisë Demokratike, Lulzim Basha po bënte publik vendimin e Këshillit Kombëtar, deputetët e PD në Parlamentin e Shqipërisë kishin filluar të firmosin një dokument me anë të të cilit japin dorëheqje vullnetare nga mandati i tyre.

Ndryshe, vendimi i Këshillit Kombëtar të Partisë Demokratike është vendim final për djegien e mandateve, i cili vjen pas propozimit të kryetarit Lulzim Basha I cili erdhi me përfundimin e Protestës së Madhe të 16 Shkurtit, propozim i cili u miratua nga Grupi Parlementar dhe Kryesia e PD.

Fjala e plotë: 

Zonja dhe zotërinj!

Vëllezër dhe motra, qytetarë dhe qytetare të Tiranës!

Demokrate dhe demokratë!

Kam nderin dhe privilegjin t’ju bëj të ditur vendimin unanim të Këshillit Kombëtar të Partisë Demokratike të Shqipërisë për djegien e mandateve parlamentare me efekt të menjëhershëm.

Në këtë 20 shkurt të vitit 2019-të, 28 vite pas rrëzimit të simbolit të diktaturës më të egër që ka përjetuar Europa, shqiptarët, të bashkuar si asnjëherë, do të kenë në krahun e tyre Partinë Demokratike. Njerëzit tanë do të jenë në krah të qytetarëve si qytetarë të thjeshtë, për të vendosur që kurrë më në Shqipëri të mos vendoset një rregjim tjetër diktatorial. Kurrë më ligjet, Kushtetuta, të drejtat themelore të njeriut, të mos shkelen e të dhunohen siç ka ndodhur rëndom këto 5 vite të qeverisjes kriminale dhe të korruptuar, që vendit t’i kthehen zgjedhjet e lira e të ndershme dhe parlamenti të mos jetë më strofkull e krimit dhe e korrupsionit, port ë jetë tempull i Demokracisë, përfaqësues i denjë i qytetarëve shqiptarë.

Ne e hedhim këtë hap pasi kemi shterruar çdo mundësi tjetër për t’i kthyer legjitimitetin institucioneve të mbetura apo për të ringritur ato që janë shkatërruar apo kapur nga krimi i bërë njësh me pushtetin dhe pushteti i bërë njësh me krimin. Por, pas urdhrit të sovranit, i cili ushtroi fuqishëm në protestën më të madhe që Shqipëria ka parë, atë të shtunës së kaluar, 16 shkurtit, ne nuk kemi asnjë rrugë tjetër dhe zgjedhim me përgjegjësi të plotë t’i bindemi urdhrit të sovranit.

Sovrani në Republikën e Shqipërisë është populli, ndaj qytetarët jeni ju.

Përmes këtij vendimi të veshtirë dhe të paprecedent, ne synojmë të çojmë deri në fund betejën tonë për vlerat europiane.

Ne do ta hapim derën që na është mbyllur tash sa vjet, ne do ta hapim derën që na çon drejt Europës. Ajo derë është shpëtimi ynë, por ajo derë do të hapet vetëm kur vendi të ketë zgjedhje të lira e të ndershme, kur vendi të ketë një shtet të së drejtës, nuk dhunon të pafajshmit dhe mbron të korruptuarit dhe kriminelët.

Ne do ta hapim atë derë, kur ndarja e pushteteve dhe përgjegjësia vetëm para qytetarëve, të garantojë një qeverisje të përgjegjshme që u bëhet krah njerëzve, duke filluar me më të pamundurit, duke filluar me ata që kanë më shumë nevojë për ndihmë dhe duke vazhduar me të gjithë qytetarët shqiptarë, të papunët, sipërmarrjen e vogël, fermerët, profesionistët, shtresen e mesme, biznesin që të hapë vende pune e të gjenerojë mundësi, liri dhe vlera, për të përndjekurit politikë, për t’i dhënë fund sagës së tyre që është turpi ynë si komb dhe pronarëve, për t’i dhënë rinisë rolin drejtues. Beteja jonë më e rëndësishme është që rinia shqiptare një orë e më parë të marrë në dorë fatet e këtij vendi, sepse ajo do të jetë ora e parë europiane e Shqipërisë.

Zonja dhe zotërinj!

Vendimi i marrë sot, është vetëm fillimi i një beteje, por unë e di se këtë betejë të madhe, ne të gjithë së bashku do ta fitojmë për Shqipërinë, për demokracinë, për Europën, për Amerikën. Do ta fitojmë për të sotmen, do ta fitojmë për të nesërmen, për të ardhmen e këtij vendi.

Ndaj ju ftoj, askush mos të mungojë, zonja dhe zotërinj, qytetare e qytetarë, demokratë dhe socialistë të tradhëtuar nga rilindja kriminale, në protestën e nesërme në orën 10.00 para Kuvendit të Shqipërisë  i cili një orë e më parë do t’i kthehet Shqipërisë dhe shqiptarëve dhe jo krimit dhe korrupsionit.

Zoti e bekoftë Shqipërinë!

Zoti i bekoftë shqiptarët!

Fitore!