Këshilli Legjislacionit/ PD kërkon amendim të Kushtetutës: Ja si do të bëhet Vettingu në Politikë

Partia Demokratike ka sqaruar para anëtarëve të Këshillit të Legjislacionit në Kryesine e Parlamentit, propozimin e saj për mënyrën se si do të bëhet Vettingu në Politikë:

“Propozimi ynë është fare i thjeshtë: Vetting me të njejtin formulim ligjor si për prokurorët, gjykatësit dhe policët,”­ tha para anëtarëve të Këshillit deputeti i PD, Oerd Bylykbashi duke shtuar se trajtim special për politikanët nuk mund të ketë më:

“Ky shtet do mësojë ti trajtojë të gjithe njësoj: si policin e thjeshtëe, si ministrin e brendshëm! Ky është parimi që kemi në Kushtetutë! Ky është parimi i Evropës ku duam të jemi pjesë!”

Bylykbashi tha se ajo që PD ka propozuar është amendim i Kushtetutës për të sanksionuar vettingun në politikë.

“Pastaj duhet një ligj për të përcaktuar detajet si do realizohet vetingu. Me miratimin e amendimit kushtetues ne do i paraqesim Kuvendit propozimin tonë ligjor si do bëhet vetingu”

Sipas tij, parimet kryesore se si duhet të bëhet vettingu janë:

1.Do të jetë një proces krejtësisht i pavarur dhe i palidhur dhe i pandikuar nga vettingu i drejtësisë;

2.Do të jetë një model shumë më i thjeshtë dhe i qartë, afër modelit që u përdor për dekriminalizimin;

3.Do të kryhet nga një strukturë profesionistësh krejtësisht të pavarur nga politika;

4.Nuk mund të jetë kurrsesi një strukturë parlamentare dhe aq më pak një strukturë e përbërë nga përfaqësues partiakë: do ishte absurde dhe tallëse, politikanët do të jenë subjekt i vetingut dhe jo zbatues të vetingut;

5.Do të ketë mbikqyrje ndërkombëtare.