Këshilli Politik pa konsensus, Bylykbashi: PS ka frikë! Gjiknuri: Propozuam…

Edhe pas dy orë diksutimesh Këshilli Politik për Reformën Zgjedhore sërish përfundoi mbledhjen pa konsensus. Përfaqësuesit e Opozitës së Bashkuar, Oerd Bylykbashi dhe Petrit Vasili, akuzuan përfaqësuesin e mazhorancës Damian Gjiknuri se braktisi në mënyrë të njëanshme mbledhjen e Këshillit Politik ndërsa sqaroi se ata vazhdojnë të kërkojnë që t’i drejtohen ODIHR për pikat ku nuk gjendet konsensusi por PS ka frikë nga përgjigjia, ndaj dhe refuzon që të firmosë shkresën për të marrë opinionin për koalicionet parazgjedhore.

“Opozita nguli këmbë që e vetmja pikë e axhendës të jetë nënshkrimi i përbashkët në këtë Këshill i kërkesës drejtuar ODIHR. Gjiknuri refuzoi në mënyrë të vazhdueshme, ngulte këmbë të mbajë të pandryshuar qëndrimin e tij të palogjikshëm që të ndryshojë rregullat ndërkohë që loja ka filluar. PS nënvizoi frikën e saj nga përgjigjia që do të vijë nga ai që kemi pranuar si arbitër për zgjedhjet. Do të vazhdojmë të qëndrojmë në këtë pozicion, nëse PS nuk ndryshon qëndrim bllokon reformën konsensuale”.

Ndërsa Përfaqësuesi i PS në Këshillin Politik, Damian Gjiknuri, tha se i ka bërë një propozim të ri, Opozitës së Bashkuar dhe më pas të shkohet te ODIHR.

“Pas një mbledhje të gjate me debate dhe diskutime, ku sot ishte edhe zoti Murrizi bëmë një propozim si Parti Socialiste. I thamë: Nisur nga ndryshimet kushtetuese që kanë ndodhur, na sillni një variant të shkruar të koalicionit, sipas një legjislacioni të vendit të BE, nëse ne nuk e pranojmë i drejtohemi ODIHR,” tha Gjiknuri dhe vazhdojë të akuzojë Opozitën e Bashkuar:

“Ata duan që këto ndryshime mos zbatohet dhe të krijojnë një vakum ligjor. Ajo e ODIHR është një taktikë imponuese, ose prano atë që dua unë ose unë nuk  ka konsensus. I kemi thënë na sillni një propozim të një vend evropian. Të imponosh modele jo europiane është tallje për shqiptarët.”

I pyetur nëse do të miratohet Kodi i ri Zgjedhor pa konsensusin e Opozitës së Bashkuar, Gjiknuri tha: 

“Nuk mund të pengohet në emër të konsensusit. Konsensusi do ca parime. Do përpiqemi të sigurojmë votat për ta kaluar. PD ti vërë gishtin një ligji evropian dhe ta sjellë. Ama të rrish në një traditë që ka rënë është tallje. Ne duhet të ecim përpara pasi është kritike. Ndryshe rrezikojmë zgjedhjet”.