Këshillimi Kombëtar i Ramës, Basha: Pasi i ka varfëruar, përgjuar e shantazhuar shqiptarët…

Pas prezantimit të nismës “Këshillimi Kombëtar” në kulmin e krizës nga Kryeministri Edi Rama ka reaguar kryetari i shkarkuar i PD, Lulzim Basha, duke theksuar se propaganda është e vetmja gjë që di të ofrojë Edi Rama përballë furisë së skandaleve që e ekspozojnë si shkatërruesin e mirëqenies së shqiptarëve.

“Pasi i ka varfëruar, përgjuar, shantazhuar për të masakruar zgjedhjet, doli me devizën e vjetër ‘ç’thotë partia bën populli, ç’do populli bën partia’, sepse propaganda është e vetmja gjë që di të ofrojë përballë furisë së skandaleve që e ekspozojnë si shkatërruesin e mirëqenies së shqiptarëve. Afera mafioze e inceneratorëve dhe nxjerrja në pazar e të dhënave më sensitive të qytetarëve të një vendi anëtar të NATO-s, nuk e mbulon dot me shfaqje bajate,” thekson Lulzim Basha në reagimin e tij përmes rrjetit social Twitter duke përfunduar:

“Këto skandale, vjedhjesh, mashtrimesh, manipulimesh që po lëkund themelet e shtetit, s’kanë nevojë për shfaqje, por kërkojnë drejtësi për të çliruar shqiptarët nga shteti i kapur nga korrupsioni”.

Ndryshe, sot kur qytetarët e Republikës së Shqipërisë ishin në pritje të emrit të personit që u nxori sheshit të dhënat e tyre konfidenciale, Kryeministri Edi Rama doli i pashqetësuar me përfundimin e mbledhjes së qeverisë për t’iu thënë shqiptarëve se ka një vendim të posaçëm të qeverisë së tij i cili u miratua sot. Pas 3 fitoreve me radhë në zgjedhjet parlamentare, Edi Rama sot tha se ka marrë vendim për një Këshillim Kombëtar për çështje të rëndësishme që kanë të bëjnë me ekonominë, shoqërinë, marrëdhëniet e Shqipërisë me jashtë etj. i cili do të bëhet përmes një pyetësori i cili do t’u vihet në dispozicion të gjithë shqiptarëve.