Këtë Qeveri s’mund ta mbrojë më SPAK, Berisha: Do përballet me popullin!

Protestat nuk do të ndalen, tha Kryetari i Partisë Demokratike, Sali Berisha, në takim me krerët e degëve Tiranë duke u shprehur qartë se këtë Qeveri s’mund ta mbrojë më SPAK, dhe ajo duhet të ikë.

E pranoi se nëse opozita do të ishte në lartësinë e duhur, Edi Rama sot do të ishte në burg, ashtu siç e pranoi se mediat nuk i kanë në favor, kështu edhe me këtë rast hapat që duhet ndërmarr deri në largimin e Edi Ramës nga froni i Kryeministrit.

“Vjedhje dhe shpërdorime nga ky regjim monist. Sa do të lejojmë ne që të vidhen, të varfërohen në këtë mënyrë qytetarët shqiptarë, ne jemi përgjegjës. Nëse opozita do të kishte qenë në lartësinë e duhur, në misionin e vet, Edi Rama s’do të ishte kurrë sot në pushtet, do të ishte në burg për vjedhjen që ka bërë. I dënuar ndoshta edhe 50 vjet duke i mbledhur së bashku. Kjo është e vërteta. Ky është realiteti.

Ne kemi humbur kohë, por duhet t’ju jemi mirënjohës qytetarëve të cilët dëshmuan se janë për opozitë të vërtetë dhe u përgjigjën me besimin se ne jemi opozitë e vërtetë, ne do t’i mbrojmë interesat e tyre,” tha Sali Berisha duke i bërë të ditur qytetarëve shqiptarë, krerëve të degës dhe fajtorit për gjendjen e krijuar, Edi Ramës:

“Protestat nuk ndalen më. 7 korriku ishte hapi i parë, opozita në këmbë, por protestat kur të fillojnë nuk ndalen, do jenë forma të shumëllojta. Kjo qeveri duhet të ikë. S’mund ta mbrojë më SPAK këtë qeveri. Jo! Do përballet me popullin. SPAK-u është bërë kapaku i të gjitha vjedhjeve të tyre.

Ka 4-5 muaj që ka dalë çështja e inceneratorëve, çdo ditë Erion Veliaj me bandën e tij merr 80 mijë euro në ditë nga thesari, nga paratë e taksapaguesve, nga ata që janë në kërkim gjoja, Zoto, Mërtiri, Gugallja. Nuk ka cinizëm më ekstrem të kësaj drejtësie ndaj qytetarëve shqiptarë. Si mund t’ua japë paratë njerëzve në kërkim? Ua jep sepse ata kanë në thes Edi Ramën, Engjëll Agaçin, Arben Ahmetajn, Erion Veliajn. Tallen me ne, bëjnë teatër. A do të pranojmë që ata të bëjnë teatër? Jo! Ne kemi detyrime ndaj qytetarëve, do t’i përmbushim ato,” tha Berisha duke shtuar se sikur drejtësia do të vepronte, PD do ta vlerësonte, por këtu drejtësia përdoret për të vënë kapak.

Me këtë rast, Kryetari i PD foli dhe për përcjelljen e mesazhin për zgjedhësit, kur mediat nuk janë në favor të opozitës.

“Ta përmbysim tërësisht situatën në rrjetet sociale. Ne duhet të dominojmë! Treguesit janë shumë të mirë, por ne duhet ta vlerësojmë këtë. Do insistoni pranë anëtarësisë tonë. Të bëjmë gjithçka për shfrytëzimin maksimal të rrjeteve sociale. Hiqeni nga mendja, se e dëgjoni shpesh se nuk fitohet me Facebook. Fitorja është komplekse dhe unë ua them se vetëm me Facebook nuk fitohet, por edhe pa komunikim shumë e vështirë të fitohet.

Duhet ta keni shumë të qartë këtë dhe historia ka faktuar se aty ku mediat e mëdha nuk janë në favor të opozitës, përcaktuese ka qenë përdorimi i rrjeteve sociale nga opozita dhe kanë fituar zgjedhjet duke dominuar.

A i kemi ne mediat e mëdha? Jo. Nuk janë në favor. Zbatojnë porosi. Nuk i drejtojmë dot, por ne zhvillojmë një dimension ku nuk na ndërhyn dot. Ju jeni politikanë, çdo ngacmim që ju vjen, çdo mendim që ju vjen kundër qeverisë, hidheni në Facebook, të mos e mbajmë në mendjen tonë. Merrni nga portalet lajme, analiza, të dhëna dhe t’i shumëfishojmë. Por këtu kemi një rezervë shumë të madhe, në shumëfishimin e aktivitetit tonë në rrjetet sociale,” tha Kryetari i PD, Sali Berisha, duke këshilluar krerët e degëve në Tiranë për aktivitet në rrjetet sociale meqë sot janë mjeti kryesor për përcjelljen e mesazhit:

“Asnjëherë mos besoni dhe mos dëgjoni ata që thonë se nuk fitohen zgjedhjet në Facebook. Komunikimi ka një rëndësi shumë të madhe, përcjellja e mesazhit ka një rëndësi të jashtëzakonshme. Rrjetet sociale janë sot mjeti më kryesor për të përcjellë mesazhin.”