KFOR i përgjigjet Vuçiçit: Situata e sigurisë në Kosovë është e qetë!

Zëdhënësi i ri i KFOR, Pio Sabetta i është përgjigjur Presidentit të Serbisë, Aleksandar Vuçiç, i cili për vjeshtë paralajmëroi incidente në Kosovë.

Gjendja e sigurisë është rezultat i shumë faktorëve, si ekonomia, politika, mirëqenia, të gjitha këto mund të ndikojnë në gjendjen e sigurisë e cila monitorohet çdo ditë në mënyrë që të merren masat e nevojshme, tha Zëdhënësi i ri i KFOR-it, Pio Sabetta, për të përditshmen serbe “Danas” duke reaguar ndaj vlerësimit të Presidentit të Serbisë, Aleksandar Vuçiç se në vjeshtë mund të ketë incidente në Kosovë.

I pyetur nëse KFOR-i ka njohuri në lidhje organizatën terroriste shqiptare B-13, për të cilën disa media në Serbi pohojnë se ka në plan të sulmojë serbët në Mitrovicën veriore, Sabetta u përgjigj se KFOR-i po e ndjek me vigjilencë dhe në vazhdimësi situatën ndërsa ka sqaruar se duke u bazuar në Rezolutën 1244 të Këshillit të Sigurimit të OKB dhe mandatin që ka KFOR-i, ky mision ushtarak nuk ka kurrfarë roli në sundimin e ligjit në Kosovë dhe nuk është i përfshirë në luftën kundër terrorizmit,

Aleksandar Vuçiç në një intervistë për TV Prva, tha se nuk përjashton mundësinë e incidenteve në Kosovë, por garantoi se nuk do të ketë zbatim të planit të B-13, meqë Serbia nuk do të lejojë dëbimin ose vrasjen e serbëve.