Mitrovicë, KFOR-i rrit praninë në Urën mbi lumin Ibër
Misioni paqeruajtës i NATO-s në Kosovë, KFOR, ka rritur sot praninë në Urën mbi lumin Ibër në Mitrovicë.
Mbi këtë urë, që ndan Mitrovicën e Jugut të banuar me shqiptarë, me atë të Veriut të banuar me shumicë serbe, përveç makinave, është parë edhe një kordon i pjesëtarëve të KFOR-it.
RFE raporton se ka pyetur KFOR-in pse ka rritur praninë mbi urë, por nga ky mision nuk kanë kthyer përgjigje.
Por, një pjesëtar i forcave italiane të KFOR-it në urën mbi lumin Ibër tha terren se gjatë ditës së sotme, “nuk pritet ndonjë gjë e veçantë” dhe se ato gjenden aty “për shkak të operacioneve rutinore”.
Ndryshe, rritja e pranisë mbi këtë urë vjen një ditë pasi autoritetet e Kosovës mbyllën pesë komuna paralele serbe në veri të Kosovës. raporton RFE.
Aksioni është kritikuar nga bashkësia ndërkombëtare, e cila i ka bërë thirrje Qeverisë së Kosovës që të mos ndërmarrë veprime të njëanshme dhe të pakoordinuara.
