KFOR, Policia e Kosovës dhe EULEX diskutuan për masat e shtensionimit në veri

Edhe sot godinat e komunave në veri janë ruajtur nga pjesëtarët e Policisë së Kosovës dhe KFOR-it ndonëse prezenca e tyre u zvogëlua për 25%, dhe ata po vazhdojnë të kujdesen për rend e siguri në këto komuna.

Por a mund të ketë sërish zvogëlim të prezencës policore në dhe rreth ndërtesave komunale?

Shefi i EULEX-it në Kosovë, Pietro Barbano, tha se për këtë mund të vendoset gjatë ditëve në vijim.

“Pata një diskutim shumë të frytshëm me drejtorin e Përgjithshëm të Policisë së Kosovës, Gazmend Hoxha dhe komandantin e KFOR-it, Angelo Michele Ristuccia: Ramë dakord për modalitetet e përgjithshme për ta forcuar më tej bashkëpunimin dhe bashkërendimin tonë të vazhdueshëm në mbështetje të stabilitetit në Kosovë dhe sigurinë e të gjitha komuniteteve të saj. Në ditët në vijim presim takime teknike vijuese me Policinë e Kosovës për të kryer vlerësime të përbashkëta dyjavore të sigurisë ndërmjet Policisë së Kosovës dhe EULEX-it dhe, sipas rastit, me KFOR-in,” tha Pietro Barbano përmes rrjetit social Twitter.

Që në ditët në vijim mund të ketë një vendim për zvogëlim të prezencës policore, e konfirmon edhe zëvendëskomandanti i Policisë për rajonin e veriut, Veton Elshani.

“Atë që mund të konfirmoj është se drejtori i përgjithshëm i policisë e ka formuar një grup punues pjesë e të cilit jam edhe unë. Vendimi do të merret pas konsultimeve me partner ashtu si e parasheh edhe marrëveshja. Kështu që po, në ditët në vijim do të kemi me siguri një vendim që do të merret nga ana e drejtorit të përgjithshëm të Policisë, pra nga ana jonë dhe nga partnerët e tjerë,” tha Veton Elshani duke shtuar se numri i policëve në veri është i mjaftueshëm dhe janë të gatshëm të ofrojnë siguri në këtë pjesë.

Ndryshe, në takimin e 10 korrikut në Bratislavë është arritur një dakordësi për zvogëlim në masën e 25% të prezencës policore.