KFOR shton prezencën në veri të Kosovës
Forca paqeruajtëse e NATO-s ka shtuar prezencën në veri të Kosovës, vendim ky i cili është marrë jo vetëm pse vazhdon bllokimi i rrugëve kryesore të organizuar nga serbët lokalë.
Shtimi i konsiderueshëm i trupave të KFOR-it u bë pasi grupe nga Serbia organizuan një protestë në anën serbe të kufirit me Kosovën në Jarinje dhe u përpoqën të hynin në Kosovë, por u ndaluan me dhunë nga policia e Serbisë. Protesta u organizua nga grupe të ekstremistëve nga Serbia.
KFOR bën thirrje për heqje dorë nga provokimet
“Pas koordinimit me të gjitha palët, KFOR-i ka shtuar praninë e tij në Jarinje për arsye të sigurisë. Kjo rritje vjen si pasojë e prezencës së mundshme të grupeve të organizuara kriminale brenda protestuesve,” thuhet në njoftim të KFOR-it.
“Është gjithmonë e rëndësishme që të gjithë personat që marrin pjesë në një protestë të shprehin mendimet e tyre në mënyrë paqësore, duke shmangur dhunën joproporcionale, qëndrimet dhe sjelljet agresive që mund të keqkuptohen dhe të perceptohen si provokim apo dhunë të panevojshme”, thuhet në njoftimin e KFOR-it duke shtuar:
“KFOR-i është plotësisht i fokusuar në zbatimin e përditshëm të mandatit të tij, bazuar në Rezolutën 1244 të Këshillit të Sigurimit të OKB-së, për të ofruar një mjedis të sigurt për të garantuar dhe lirinë e lëvizjes, në të mirë të të gjitha komuniteteve që jetojnë në Kosovë.”
Ndërkohë KFOR bënë të ditur se në ditët në vijim forcat paqëruajtëse do të kryejnë stërvitje të rregullta ushtarake afër bazës në Novosellë në veri.
“Stërvitjet synojnë të trajnojnë njësitet e KFOR-it, për të garantuar lirinë e lëvizjes në kohë krizash dhe konsistojnë në një seri të simulimeve taktike dhe aktiviteteve logjistike, përfshirë pajisje të rënda dhe helikopterë”.
Njoftimi i KFOR-it për këto stërvitje në veri të Kosovës, vjen në kohën kur autoritetet e Kosovës bëjnë thirrje për heqjen e barrikadave të ngritura nga serbët lokalë në veri të Kosovës që po pengojnë lirinë e lëvizjes.
Barrikadat janë ngritur dhjetë ditë më parë në këtë pjesë të Kosovës, si shenjë pakënaqësie ndaj arrestimit të ish-zyrtarit serb të Policisë së Kosovës, Dejan Pantiç. Pantiç dyshohet se ka organizuar “sulm terrorist” në zyrat e Komisionit Qendror të Zgjedhjeve në veri të Kosovës më herët gjatë muajit dhjetor.
Ndryshe, thirrjes së djeshme pë protestë në vendkalimin Jarinje nga krimineli serb Damjan Knezheviç, që është dhe lider i grupit ekstremist serbë “Patrulla Kombëtare” nga Serbia, i është bashkuar një grup i vogël që mediat antiqeveritare serbe i identifikuan si grupi njerëzve të Vuçiçit.
Ndërkohë Ministri i Brendshëm i Kosovës, Xhelal Sveçla, u shpreh pas protestës në anën serbe të kufirit në Jarinje , se është shfaqur një episod i nivelit të lartë të luftës hibride serbo-ruse ndaj Kosovës.
“Të njëjtët aktorë joshtetërorë, por të cilët i përdor edhe regjimi në Beograd edhe ai në Moskë, të përfaqësuar nga Damjan Knezheviç, bashkëpunëtor i organizatës paramilitare famëkeqe ruse Wagner, mësynë që ta thyejnë këtë pikëkalim kufitar. Ditët e fundit, aktorë të tjerë shtetërore e joshtetërorë të këtyre dy vendeve, që janë të vetmet, që nga Lufta e Dyte Botërore, që ndezën luftëra në Evropë, kanë hyrë brenda territorit të Kosovës dhe ende gjenden këtu,” thekson Sveçla duke shtuar synimi i të armatosurve të maskuar dhe të barrikaduar në rrugë është që ta cenojnë sovranitetin e Kosovës, duke nxitur provokime agresive, ndërsa garanton policia e Kosovës është e aftë dhe ka kapacitete të përballet me struktura kriminale.
