Rusët marrin aeroportin Hostomel! Moska: Kemi vrarë 200 ukrainas; Kievi: Kemi vrarë 1.000 rusë!

Deri sa në qytetin e Kievit po zhvillohen luftime të ashpra, ministria e Mbrojtjes e Rusisë ka bërë të ditur se forcat ruse kanë marrë nën kontroll aeroportin Hostomel tek Kievi, operacion në të cilin kanë marrë pjesë 200 helikopterë.

Ministria e Mbrojtjes e Rusisë thekson se kanë vrarë 200 ushtarë ukrainas të njësiteve speciale, dhe sipas kësaj ministrie, humbje nga ana ruse nuk kishte, raporton Agjencia ruse e lajmeve, RIA Novosti.

Ndërsa ministria ukrainase e Mbrojtjes duke konfirmuar se në sulmin ndaj aeroportit Hostomel morën pjesë 200 helikopterë dhe mijëra ushtarë, thekson se deri më tani Rusia ka humbur mbi 1.000 ushtarë, që është dhe humbja më e madhe në historinë ruse të konflikteve që ajo i ka filluar.

Ndërkohë ministri i Forcave të Armatosura të Mbretërisë së Bashkuara, James Heappey, tha para përfaqësuesve të Dhomës së Ultë se nga fillimi i pushtimit dje dhe deri më sot janë vrarë 450 ushtarë rus dhe 194 ukrainas, duke përfshirë këtu dhe 57 civil.