Kina deri në fund të vitit do të prodhojë 3 mld doza të vaksinës kundër COVID-19

Kina deri në fund të vitit do të prodhojë 3 miliardë doza të vaksinës kundër COVID-19, tha sot një zyrtar i Komitetit kombëtar të Shëndetësisë, NHC.

“Kemi kapacitete që në gjysmën e dytë të vitit të plotësojmë kërkesat,” tha Zheng Zhongwei, i cili koordinon projektet e zhvillimit të vaksinës.

Qeveria e Kinës ka publikuar të dhënat më të reja që flasin se prodhimi i vaksinës nga 1 Shkurti deri më 5 Mars është trefishuar, në pesë milionë doza në ditë.

Prodhuesi i vaksinave Sinovac Biotech ka bërë të ditur se këtë muaj ka dyfishuar prodhimin vjetor në dy miliardë doza.

Grupi Farmaceutik Kombëtar Kinez, Sinopharm, ka bërë të ditur se duke filluar nga fillimi i muajit prill do të mund të porositen çdo muaj nga 100 milionë doza vaksinash kundër COVID-19. Qëllimi i këtij Grupi është të rriten kapacitetet prodhuese në tre miliardë doza në vit.