Kina po ndërton një super-ambasadë në Evropë. Ka 208 dhoma sekrete

Kina po planifikon të ndërtojë një dhomë të fshehtë pranë kabllove më të ndjeshme të komunikimit të Mbretërisë së Bashkuar, si pjesë e një rrjeti prej 208 dhomash sekrete nën “super-ambasadën” e saj të re në Londër.

Informacioni është zbuluar në plane të detajuara dhe të paredaktuara për një kompleks nëntokësor nën kompleksin e gjerë diplomatik në Londrën qendrore, të cilin Pekini është përpjekur ta mbajë sekret, raporton The Telegraph.

Pavarësisht rreziqeve të dukshme të sigurisë, Kryeministri Sir Keir Starmer pritet të miratojë ambasadën në prag të vizitës së tij në Kinë gjatë këtijë muaji, ku pritet të takohet me Presidentin Xi Jinping.

Dhomë e fshehur pranë kabllove kryesore
Skicat, të cilat janë redaktuar në të gjitha versionet e disponueshme publikisht, tregojnë se një nga dhomat sekrete do të vendoset direkt pranë kabllove me fibra optike që mbajnë të dhëna financiare, email-e dhe mesazhe nga miliona përdorues të internetit.

Dhoma është e pajisur me sisteme shkarkimi të ajrit të nxehtë, duke sugjeruar instalimin e mundshëm të pajisjeve që gjenerojnë nxehtësi, siç janë kompjuterët spiunë të përparuar. Planet zbulojnë gjithashtu qëllimin e Kinës për të shembur dhe rindërtuar murin e jashtëm të bodrumit, menjëherë pranë kabllove me fibra optike.

China embassy’s hidden basement in London

The Telegraph has uncovered unredacted plans showing that China intends to build a concealed underground chamber beneath its proposed London “super-embassy,” located directly beside fibre-optic cables carrying highly sensitive financial… pic.twitter.com/YkjBEixA4Q

— Visegrád 24 (@visegrad24) January 13, 2026

Frika nga spiunazhi
Zbulimet kanë ringjallë frikën se Pekini mund të përpiqet të përgjojë informacionet për të fituar akses në sekretet shtetërore dhe financiare të Mbretërisë së Bashkuar.

Projekti i ambasadës, i cili do të shtrihet në 22,000 metra katrorë në vendin e ish-Royal Mint dhe do të jetë misioni më i madh diplomatik i Kinës në Evropë, është përfshirë në polemika. Dominic Cummings, ish-këshilltari kryesor i Boris Johnson, pretendoi se ishte paralajmëruar nga MI5 dhe MI6 se Kina po “përpiqej të ndërtonte një qendër spiunazhi nën ambasadë”.

Detajet e dhomës kryesore nëntokësore
Nga 208 dhomat e zbuluara, më e rëndësishmja ndodhet nën ndërtesën e Regjistrit të Detarëve në cepin veriperëndimor të kompleksit. Është një dhomë nëntokësore trekëndëshe deri në 40 metra e gjerë dhe 2-3 metra e thellë, me murin e saj të jashtëm që kufizohet me Rrugën Mansell.

Një detaj kyç në plane është qëllimi për të prishur dhe rindërtuar këtë mur të jashtëm të bodrumit. Punime të tilla ndërtimi do t’i sillnin zyrtarët kinezë pak metra larg kabllove me fibra optike që kalojnë nën trotuar, duke rritur mundësinë e përgjimit.

Planet e telekomunikacionit tregojnë se kabllot me fibra optike i përkasin BT Openreach, Colt Technologies dhe gjigantit amerikan Verizon Business. Ato formojnë thelbin e London Internet Exchange (Linx), një nga më të mëdhenjtë në botë, dhe mbajnë sasi të mëdha të dhënash, nga transaksionet financiare te mesazhet dhe emailet private. Jashtë Londrës, ato lidhen me kabllot transatlantike që çojnë në SHBA.

Mundësi përgjimi
Vizatime shtesë sugjerojnë se dhoma sekrete do të jetë e pajisur me të paktën dy sisteme nxjerrjeje ajri, duke nënkuptuar nevojën për të ftohur pajisjet. Një shpjegim është se Kina po planifikon të instalojë një infrastrukturë kompjuterike në shkallë të gjerë për operacionin e saj të spiunazhit.

Nga ana tjetër, Kina mund të ketë arsye të mira për instalimin e sistemit të ftohjes, siç është një qendër të dhënash për stafin e ambasadës, palestra ose kafene. Megjithatë, afërsia me infrastrukturën kryesore të komunikimit thellon shqetësimet.

Planet tregojnë gjithashtu propozime për apartamente brenda ndërtesës së Shtëpisë së Ambasadave, duke filluar nga akomodime luksoze për diplomatë të lartë te njësi më të vogla në stil studiosh. Nuk ka prova të objekteve të paraburgimit, të cilave disa kritikë u kishin frikë.