Kisha Ortodokse Serbe njeh Kishën Ortodokse Maqedonase

Kisha Ortodokse Serbe ka bërë të ditur sot vendimin për njohjen e Autoqefalisë së Kishës Ortodokse Maqedonase. Kjo u bë e ditur nga kreu i Kishës Ortodokse Serbe, patriarku Porfirie, në liturgjinë e përbashkët ndërmjet dy kishave që u mbajt në Shkup.

Pas kompletimit të dokumenteve ligjore, tha ai, do të përgatitet një akt zyrtar me të cilin do të njoftohen të gjitha kishat e tjera kanunore ortodokse.

Patriarku i Kishës Ortodokse Serbe, Porfirie, pret që të gjitha kishat lokale të pranojnë statusin autoqefal të Kishës Ortodokse Maqedonase – Kryepeshkopatës së Ohrit.

“Jemi të sigurt se edhe kishat e tjera lokale do ta mirëpresin Autoqefalinë e Kishës Ortodokse Maqedonase – Kryepeshkopatës së Ohrit”, tha patriarku Porfirie.

Liturgjia u mbajt në ditën e shenjtorëve sllavë, Kiril dhe Metodi.

Kryepeshkopi i Ohrit dhe Maqedonisë, Stefani, falënderoi anëtarët e Sinodit të Shenjtë të Peshkopatave të Kishës Ortodokse Serbe për njohjen e autoqefalisë së Kishës Ortodokse Serbe.

Liturgjia e përbashkët ishe vazhdimësi e forcimit të marrëdhënieve ndërmjet dy kishave, e cila nisi të enjten e kaluar në kishën Shën Sava në Beograd.

Vendim i Kishës Ortodokse Serbe pasoi vendimin e 9 majit të Patriarkanës Ekumenike në Stamboll, e cila njohu Kryepeshkopin e Ohrit si kanonike apo të pavarur.

Të dyja kishat, ajo serbe dhe maqedonase, raporton RFE, ndodhen në një kontest që ka zgjatur rreth 55 vjet, pas shpalljes së njëanshme të pavarësisë së Kishës Ortodokse Maqedonase, në vitin 1967, por autoqefalia e kësaj kishe nuk është njohur nga asnjë kishë lokale apo në rajon.