Kjo është luftë, Orban: Hungaria mbështet të gjitha sanksionet kundër Rusisë!

Hungaria do t’i mbështesë të gjitha sanksionet e Bashkimit Evropian kundër Rusisë dhe nuk do të bllokojë asgjë, tha kryeministri Viktor Orban.

“Atë që e vendosin kryeministrat e BE-së, e pranojmë dhe e mbështesim edhe ne,” tha Orban, duke folur në kufirin Hungari-Ukrainë.

“Kjo është koha për të qenë të bashkuar. Është luftë,” tha ai duke shtuar se përpjekjet për paqe janë më të rëndësishme.

Sipas gazetës britanike Guardian, Orban është konsideruar më herët si njëri nga aleatët më të ngushtë të presidentit rus, Vladimir Putin, brenda BE-së.

Bashkimi Evropian, deri më tani, ka shpallur tri raunde sanksionesh kundër Rusisë, për shkak të pushtimit të Ukrainës. Sanksionet e BE-së, që godasin edhe presidentin rus, Vladimir Putin, dhe ministrin e tij të Jashtëm, Sergei Lavrov, duhet të miratohen me unanimitet.

Rusia, raporton RFE, ka nisur ofensivën ushtarake në Ukrainë më 24 shkurt. Putin tha se ka autorizuar “një operacion të posaçëm ushtarak”, për të eliminuar, sipas tij, kërcënimin serioz nga Ukraina. Qëllim i operacionit, tha ai, është çmilitarizimi i fqinjit jugor të Rusisë.

Perëndimi e ka dënuar ashpër këtë akt, duke e cilësuar si shkelje të sovranitetit dhe integritetit territorial të Ukrainës.