Klasifikimi i AfD-së si ekstremiste, Marco Rubio: Tirani! Reagon Berlini
Klasifikimi i partisë AfD si ekstremiste e djathtë nga Zyra Federale për Mbrojtjen e Kushtetutës nuk është pritur mirë nga administrata e re amerikane. Kritikave nga Washingtoni i është përgjigjur Berlini zyrtar.
Sekretari amerikan i Shtetit, Marco Rubio, i ka bëri thirrje Gjermanisë të ndryshojë kursin pas klasifikimit të AfD-së si “parti ekstremiste e djathtë”. Rubio e quajti këtë veprim “tirani të maskuar” dhe shkroi në platformën X se “Gjermania duhet të ndryshojë kursin”.
Ekstremiste nuk është kjo parti, e cila në zgjedhjet e fundit doli e dyta, por “politika vdekjeprurëse e emigracionit me kufij të hapur që ndjekt establishmenti, të cilën e refuzon AfD-ja,” shprehet Rubio.
Gjermania sapo i ka dhënë agjencisë së saj të spiunazhit kompetenca të reja për të mbikëqyrur opozitën, shkroi Rubio në platformën X. “Kjo nuk është demokraci – është një tirani e fshehtë”.
Ministria e Jashtme në Berlin i është përgjigjur më pas postimit të Rubios, duke deklaruar se “kjo është demokracia”. Në reagimin e Ministrisë së Jashtme në Berlin thuhet, se “ky vendim është rezultat i një hetimi të plotë dhe të pavarur për të mbrojtur Kushtetutën tonë dhe sundimin e ligjit”. Fjala e fundit do t’u lihet “gjykatave të pavarura”, shpjegoi Ministria e Jashtme. “Ne kemi mësuar nga historia jonë se ekstremizmi i krahut të djathtë duhet të ndalet.”
SHBA mbështeti Weidel gjatë fushatës elektorale
Zëvendëspresidenti i SHBA-së, JD Vance, gjatë Konferencës së Sigurisë në Mynih në mes të muajit shkurt, kishte paralajmëruar për një kërcënim ndaj demokracisë në Gjermani. Ai iu referua tërthorazi debatit gjerman për izolimin e AfD-së dhe tha se nuk ka vend për vija demarkacioni apo mure ndarëse.
Gjatë konferencës Vance u takua edhe me udhëheqësen e AfD-së, Alice Weidel, e cila mori gjithashtu mbështetje gjatë fushatës elektorale nga këshilltari i Trumpit, Elon Musk. Bashkëkryetari i partisë AfD, Tino Chrupalla, shkoi në Uashington për të marrë pjesë në ceremoninë e inaugurimit të presidentit Trump.
Pas disa vitesh hetimesh Zyra Federale për Mbrojtjen e Kushtetutës, BfV, e klasifikoi AfD-në pa dyshim si ekstremiste të djathtë. Ky klasifikim u dha sërish vrull diskutimeve për ndalimin e AfD-së. Megjithatë kancelari në largim, Olaf Scholz, SPD, paralajmëroi kundër një “vendimi të nxituar”.
