Kleptokraci me Opozitë!

nga Agim Popoci

Tranzicioni në shtetet që u shkëputën nga kthetrat komuniste pak a shumë ishte i ngjashëm dhe u shoqërua me autokraci nga më të ndryshme, si kakistokracia ku qeveria u krijua nga njerëzit më të keq të mundshëm, oligarkia ku sundon një grup i njerëzve të fuqishëm, dhe kleptokracia ku sundojnë hajdutët dhe të korruptuarit.

Në Shqipëri, ku komunizmin nuk e lanë të bie por u mjaftuan me heqjen zvarrë të një statuje aq shumë të urryer, me rrethanat e çuditshme që u krijuan ndër politikën shqiptare, kleptokracia pësoi një mutacion duke u instaluar një autokraci e re: Kleptokraci me Opozitë!

Sot ka edhe prej kundërshtarëve politik që mundohen ta shfajësojnë kleptokratin Edi Rama se nuk ishte ai që e zgjodhi Opozitën që sot ka në parlament, dhe kjo mund të jetë pjesërisht e vërtetë, por është Rama dhe vetëm Rama që e bleu, shantazhoi dhe pse jo, e kërcënoi, për të arritur qëllimet e veta!

Kur opozita vendosi të braktis parlamentin pasi nuk i ngeli hapësirë veprimi demokratik dhe kleptokracia që instaloi Edi Rama po rrëshqiste drejt shtetit totalitar, strukturave partiake për të dorëzuar mandatet nuk iu bind llumi opozitar.

Meqë me llumin komunist Edi Rama u organizua dhe erdhi në pushtet, nuk e kishte të vështirë ta menaxhoj edhe llumin që u shpërfaq në kampin kundërshtar. Madje, atë e gjeti edhe ndër ata që përfaqësojnë ajkën e kombit dhe deri tani janë fshehur nën shpirtin e Ballit Kombëtar dhe Të Përndjekurve Politik Antikomunist, njerëzit e të cilave lëvizje shkrinë pasurinë dhe familjen për kombin dhe atdheun.

Në këtë histori, krejtësisht i pafajshëm nuk ishte lideri i opozitës Lulzim Basha, madje e pranoi dhe kërkoi falje, por llumi që ngeli në parlament për ti shërbyer Edi Ramës, shumë shpejtë u zbulua se kishte arsye shumë më ordinere se sa ato materiale, për të cilat përflitej.

Shantazh apo kërcënim, pak rëndësi ka, llumi ngeli llum dhe kleptokrati Edi Rama në sy të BE-së vazhdoi sundimin duke kaluar në formën më të re të autokracisë, shtetit totalitar.

Adam Podgorecki në “Totalitarian law: Basic concepts and issues”, thotë se ka tri lloje të totalitarizmit. I pari është socio-psikologjik sepse ka të bëjë me tipin autoritar të liderit. I dyti është organizativ (institucional) sepse sot ekziston nga korporatat globale bashkëkohore. Në fund, tipi i tretë është sistematik sepse ka të bëjë me shoqërinë si bashkësi globale.

Ky është thelbi, shteti i pakufizuar dhe gjithëpërfshirës që po instalon dhe Edi  Rama me ndihmën e llumit të opozitës dhe tashmë të Kleptokracisë me Opozitë, pa liri por me siguri, pa aksion personal por me aksion të masave, duke e mbështetur me propagandimin militant të demokracisë dhe zhvillimin e frymës luftarake të formësuar nga “lideri” i pakontestueshëm.

Kjo formë e re e autokracisë, e cila po instalohet nga Edi Rama, ka vetëm një ideologji zyrtare, vetëm një parti masive, polici sekrete që mbanë gjithçka nën kontroll, kontrollin e plotë të partisë mbi mediat, monopolin partiak mbi forcën e armatosur dhe kontrollin shtetëror mbi ekonominë.

Dhe, kjo formë e re e autokracisë ndoshta edhe nuk do të diskutohej fare sikur ky llum i opozitës tashmë në shërbim të Kleptokracisë me Opozitë nuk do të ishte bërë pjesë e projektit të Edi Ramës.

Fakti që sot kjo opozitë e kleptokratit kërcënon me votë mosmiratimin e Kodit të ri Zgjedhor duke u thirr në parime, e bënë edhe më qesharak vetë sjelljen e tyre; Sepse, një Kodi i ri shkon vetëm në dëm të Edi Ramës ndërsa loja me “lista të hapura” është komprometuese për vetë ata si deputetë.

Fillimisht për “listat e hapura”. Opozitarët e kleptokratit që sot tundin idenë e listave të hapura, janë në Parlament dhe i shërbejnë Edi Ramës vetëm pse listat ishin të mbyllura. Ndryshe, kurrë, as atëherë, këta nuk do të ishin deputetë të Parlamentit të Shqipërisë, e sa për shërbëtorë të Edi Ramës, këtë nuk ka Kod Zgjedhor në botë që do t’iu ndalë edhe në të ardhmen dhe nuk ka pse shqetëohen.

Parimi! Parimi në të cilin thirren, është kocka që i ngelet në fyt këtij llumi, i cili në shërbim të Edi Ramës ka për qëllim të instaloj shtetin totalitar. Sikur të kishte zënë vend në mendjen e tyre “parimi”, Paketa Ligjore Anti-KÇK nuk do të ishte miratuar me 89 vota, votimi cili nuk është vetëm turp i 5 Marsit 2020, por turp i parlamentarizmit shqiptar. Kur një Akt Normativ i tillë kriminal u përdor nga Edi Rama për tu bërë edhe Ligj me ndihmën e këtyre “parimorëve”, sot Kryeministri Rama me Ish-Gjeneralin e tij Sandër Lleshaj, pavarësisht kundërshtive të konstitucionalistëve, shoqërisë civile dhe së fund edhe vetë SPAK-ut, vepron bazuar në një Paketë Ligjore me legjitimitet të plotë parlamentar.

Për të konfirmuar se ky llum opozitar nuk ka lidhje as me të djathtën as me të majtën, as me Ballin dhe as me të Përnjdekurit Politik, as me lopë dhe as me dhi, ata u bënë edhe pjesë e miratimit të Ligjit për sekuestrim dhe konfiskim të pronave, i cili u miratua me 86 vota. U miratua dhe Projektligji për administrimin e pronave të sekuestruara nga Operacioni Forca e Ligjit dhe Ligji “Për proceset kalimtare të pronësisë në Shqipëri” i cili mori 94 vota, për të treguar se nu kanë lidhje me partinë e cila i kishte futur në listat e mbyllura sepse janë opozitë, por kundër pronës dhe në shërbim të Kleptokracisë me Opozitë!

Dhe, që ky krim të kurorëzohet me cilësinë e makabritetit ka dhe fuqinë mbrojtëse nga zhbërja; Vështirë, shumë vështirë të zhbëhet një Paketë e tillë ligjore edhe në kushtet kur Parlamenti i Shqipërisë do të çlirohet nga Kleptokracia me Opozitë!

Sot “parimorët” e opozitës së kleptokratit mund ta refuzojnë Kodin e ri Zgjedhor duke thënë çdo minutë se Edi Rama nuk i bënë dot 82 vota për ta miratuar, por, me kaq vota u miratua Paketa Anti-shpifje e cila i mundësoi kleptokratit kontrollin e plotë mbi mediat online, portalet dhe rrjetet sociale që i prishnin gjumin shefit të Kleptokracisë me Opozitë.

Ndryshimet në Kodin Penal mund të ishin për shumë kohë ëndërr e frikshme në sirtarin e Edi Ramës, por sot kleptokrati me opozitë, pikërisht me ndihmën e kësaj të fundit vepron nën duke i dhënë urdhër Ish-Gjeneral Sandër Lleshajt, me një Kod i cili u miratua me 88 vota. A është më pak i Rëndësishëm se ai Zgjedhor, për këtë llum opozitar do ta vërteton koha, por për qytetarët civil të këtij vendi, tashmë është e qartë se a do t futet apo jo Edi Rama në shtëpinë tënde, është çështje e vullnetit të tij, vullnet i cili ka në xhep edhe Ligjin!

Në fund, për të mo si ngelur meraku këtij llumi opozitar që tund kartonin e parimit, duhet kujtuar se me ardhjen e pandemisë, periudhë kjo e artë për qëllimet e Edi Ramës, Kleptokracia me Opozitë arriti të miratoj më 16 Prill, 12 Akte Normative kriminale në emër të përballjes me pandeminë, kur Akti me fuqinë e ligjit që mori më së paku vota, ishte ai Nr.10, i datës 26 Mars 2020 “Për një ndryshim në ligjin nr.8438, datë 28.12.1998 “Për tatim mbi të ardhurat” të ndryshuar”, i cili u miratua me 94 vota.

Sot, Edi Rama mund të tallet dhe të kërcënoj çdo njeri mbi këtë tokë shqiptare ku forma më e re e autokracisë është në horizont. E dha apo jo opozita e këtij kleptokrati votën për Kodin e ri Zgjedhor, pak rëndësi ka, ky llum është fajtori kryesor pse Edi Rama arriti qëllimin e tij.

E qëllimi i Kryeministrit Edi Rama, krijimi i një shoqërie plotësisht të kontrolluar, dje mund të mos ishte i qartë për llumin e opozitës, sot është vonë.

Sot, Kleptokracia me Opozitë po sjellë në jetë të pashmangshmen, formën më të re të autokracisë, shtetin totalitar; Të cilin, më mirë se askush tjetër e ka sqaruar  Geroge Orwell në romanin e tij të njohur “1984”.