KLGJ i mohon Albin Kurtit pjesëmarrjen në zgjedhje, Haxhiu: Qytetarët janë të shqetësuar!
Në mesin e 47 kandidatëve nga gjithsej 28 subjekte politike që nuk janë certifikuar për zgjedhjet e parakohshme parlamentare të 14 shkurtit nga Këshilli Gjyqësor i Kosovës është dhe Ish-Kryeministri d he Kryetari i Lëvzijes Vetëvendosje, Albin Kurti. Ish-Ministrja e Drejtësisë dhe kandidatja e Lëvizjes Vetëvendosje për deputete, Albulena Haxhiu, duke konfirmuar se lideri i kësaj partie Albin Kurti, nuk është certifikuar nga KQZ tha se qytetarët me të drejtë janë të shqetësuar për tendencat e qëllimshme për largimin nga lista të Albinit!
“Albini, gëzon mbështetje shumë të madhe qytetare dhe kjo mbështetje është e pakontestuar prandaj qytetarët me të drejtë janë të shqetësuar për tendencat e qëllimshme për largimin nga lista të Albinit,” tha Albulena Haxhiu në reagimin e saj përmes rrjetit social Facebook duke përfunduar:
“Në shtetin e kapur, kështu ndodhë! Këto janë përpjekjet dhe shkelmat e fundit të atyre që e kapën shtetin dhe atyre që i shërbyen shtetit të kapur!”
Ndryshe, zëdhënësi i Komisionit Qendror të Zgjedhjeve të Kosovës, Valmir Elezi, ka bërë të ditur se KQZ ka kërkuar nga Paneli Zgjedhor për Ankesa dhe Parashtresa, Këshilli Gjyqësor i Kosovës, Ministria e Punëve të Jashtme dhe Agjencia e Kosovës për Inteligjencë konfirmimin për përshtatshmërinë e kandidatëve për deputetë, bazuar në nenin 29 të Ligjit për Zgjedhjet e Përgjithshme.
“Në përgjithësi, janë 47 kandidatë nga rreth 1.080, të cilët janë shpallur fajtorë për vepër penale me një vendim përfundimtar të gjykatës në tri vitet e fundit,” tha Valmir Elezi.
Në bazë të nenin 29 të Ligjit për Zgjedhjet e Përgjithshme kandidati për deputet nuk mund të jetë një person, i cili është shpallur fajtor për vepër penale me një vendim përfundimtar të gjykatës në tri vitet e fundit.
