Klitschko kërkon armë për ta mbrojtur hapësirën ajrore ukrainase

Kryetari i Bashkisë Kiev, Vitali Klitschko, u ka bërë thirrje aleatëve perëndimorë që të vazhdojnë ta furnizojnë me armë Ukrainën, teksa ky shtet po lufton kundër Rusisë.

“Ju lutem, na mbështesni”, tha ish-boksieri gjatë një interviste për të përditshmen italiane, Corriere della Sera duke i bërë thirrje aleatëve evropianë dhe NATO-s që të dërgojnë armë esenciale për të mbrojtur hapësirën ajrore mbi Kiev.

“Ne jemi në gjendje që ta mbyllim vetë hapësirën tonë ajrore”, tha Klitscho duke shtuar:

“Por, neve definitivisht na duhen armët e duhura.”

NATO vazhdimisht ka refuzuar që të krijojë një zonë të ndalim-fluturimit mbi Ukrainë, duke u thirrur në frikën se kjo mund të çojë në një konfrontim të drejtpërdrejtë ushtarak midis Rusisë dhe Perëndimit.

Sipas Klitscho, Kievi deri më tani ka regjistruar mbi 200 civilë të vrarë, ndërkaq afër 2 milionë banorë ende gjenden në qytet.

“Mos harroni se ne po mbrojmë shtetin tonë, por në të njëjtën kohë po mbrojmë vlerat thelbësore të demokracisë evropiane. Mesazhi im është i qartë: ju lutem ndaloni çdo marrëdhënie ekonomike me Rusinë sepse [presidenti rus, Vladimir] Putin po përdor çdo euro për të forcuar ushtrinë e tij, që po marshon drejt nesh”, tha ai.

Ukraina pretendon se mbi 14,000 ushtarë rusë janë vrarë

Stafi i përgjithshëm i Ushtrisë ukrainase pretendoi se mbi 14,000 trupa ruse janë vrarë gjatë tri javëve të para të pushtimit rus të Ukrainës.

Përmes një postimi në Facebook, zyrtarët ukrainas thanë se afër 14,400 ushtarë rusë janë vrarë.

Në këtë postim po ashtu u tha se Moska ka humbur pajisje ushtarake, përfshirë 1,470 transportues të blinduar, 60 tanke dhe mbi 100 avionë luftarakë dhe helikopterë.

Këto pretendime nuk kanë mundur të konfirmohen në mënyrë të pavarur, edhe pse burimet e inteligjencës perëndimore kanë sugjeruar se afër 7,000 trupa janë vrarë dhe midis 14,000 dhe 21,000 të tjerë janë plagosur.

Kryetari i Mariupolit: Luftimet po pengojnë evakuimin e civilëve

Kryetari i Mariupolit tha se luftimet në rrugët në qendër të qytetit po pengojnë përpjekjet për të shpëtuar qindra persona që gjenden të bllokuar në bodrumin e teatrit, që u bombardua nga Rusia të mërkurën.

Kryetari i Mariupolit, Vadym Boychenko, tha se ekipet e shpëtimit po arrijnë të largojnë rrënojat dhe të largojnë qytetarët, vetëm kur po ndërpriten luftimet.

“Ka tanke… dhe granatime me artileri, dhe po luftohet me të gjitha llojet e armëve në këtë zonë”, tha ai.

“Forcat tona po bëjnë gjithçka që është e mundur për të mbajtur pozicionin e tyre në qytet, por fatkeqësisht forcat e armikut janë në numër më të madh”, shtoi ai.

Ai tha se nuk mund të japë një numër se sa persona kanë arritur që të largojnë nga zona gjatë 24 orëve të fundit.

Të premten, autoritetet thanë se 130 persona kanë arritur të largohen nga teatri që u bombardua, e që përdorej si strehim nga civilët. Në momentin e bombardimit, sipas autoriteteve ukrainase, mbi 1,000 persona kanë qenë në ndërtesë, por bodrumi i teatrit nuk është prekur nga sulmi.

Rusia mohon se ka bombarduar këtë ndërtesë.

Boychenko po ashtu tha se 40,000 persona kanë arritur të largohen nga qyteti në pesë ditët e fundit, ndërkaq 20,000 të tjerë po presin që të evakuohen.

Deputeti Dmytro Gurin, prindërit e së cilit janë bllokuar në Mariupol, që gjendet në jugperëndim të Ukrainës, tha për BBC se furnizimet me ushqim dhe ujë kanë arritur në nivele të ulëta.

“Banorët nuk kanë ushqim, por më e rëndësishmja kanë mungesë të ujit. Dhe disa ditë më parë, tanket filluan të sulmonin ndërtesat nënkatëshe, në mënyrë që njerëzit të mos mund të largoheshin. Të gjithë po qëndrojnë në banesat e tyre dhe në bodrume, duke menduar nëse do të vdesin pas një ore”, tha ai.

“Granatimet nuk ndalen kurrë dhe të shtënat nuk ndalen kurrë”, shtoi ai.

“Avionët kanë lëshuar qindra bomba gjatë 24 orëve”.

Gurin po ashtu u shpreh pesimist lidhur me mundësinë e hapjes së korridoreve humanitare nga ky qytet, duke thënë se “pala ukrainase po tenton të arrijë marrëveshje për hapjen e tyre, por Rusia gjithmonë ka vetëm fjalë”.

Ai tha se bombardimet kanë shkatërruar 30 për qind të ndërtesave të qytetit dhe 50 për qind e tyre janë dëmtuar rëndë.

“Shtëpia ime është djegur plotësisht”, tha ai.

Ukraina thotë se ka vrarë një gjenerallejtënant rus

Një anëtar i ushtrisë ruse është vrarë në qytetin ukrainas Çernobaievka pas sulmeve me artileri, tha Shtabi i Përgjithshëm i Forcave të Armatosura të Ukrainës përmes një postimi në Facebook.

Në njoftim thuhet se gjenerallejtënant Andrei Mordivchev, komandant i qarkut jugor të Forcave të Armatosura ruse ka vdekur.

Në njoftimin e Forcave të Armatosura të Ukrainës po ashtu thuhet se vija e frontit të luftës nuk ka ndryshuar ndjeshëm në 24 orët e fundit, por u shtua se trupat ukrainase kanë arritur të shkatërronin disa kolona me personel ushtarak rus në rajonet Mikolaiv dhe Sumi. Këto pretendime të palës ukrainase nuk kanë mundur të verifikohen në mënyrë të pavarur./RFE/