“Kllouni Edi Rama”/ Durrës, Basha: S’është i sëmurë psiqik, por hajduti i 100.000 € në orë

Anembanë Shqipërisë po fryn era e shpresës, e shpresës për një ndryshim të madh, e shpresës për një ndryshim të vërtetë për çdo familje shqiptare, tha kryetari i Partisë Demokratike, Lulzim Basha, në një pritje madhështore që iu bë në qytetin e Durrësit ndërsa konstatoi se shqiptarët janë zgjuar, shqiptarët janë ngritur nga Tirana në Vlorë, nga Shkodra në Korçë, nga Saranda në Tropojë, për të mos u ulur më, derisa në Shqipëri, si kudo në Evropë, të kemi një demokraci të vërtetë, liri dhe mundësi për çdo shqiptar, drejtësi dhe barazi para ligjit.

“Sa herë që një regjimi i vjen fundi, sa herë që autokratëve të korruptuar u vjen fundi, përsërisin të njëjtat shfaqje të shëmtuara. Shfaqjen e shëmtuar të djeshme këtu në Durrës përsëriti pa sukses edhe njeriu që prej 6 vjetësh është përgjegjës për varfërimin më masiv të shqiptarëve, për shpunësimin më të madh në 29 vite pluralizëm, për emigracionin në shifrat më të mëdha që nga vitet ’90, kryehajduti, i kapur duke vjedhur votën e durrsakëve, votën e shqiptarëve, njeriu që ka hequr nga sofrat e familjeve shqiptare bukën e fëmijëve, duke larguar mijëra prindër nga puna, duke mbyllur bizneset, duke mbyllur shkollat, duke shkatërruar spitalet, duke rritur koston e jetesës, duke e bërë atë më të papërballueshme ses edhe popujt më të pasur të Evropës.”

Kosto e jetës për çdo shqiptar është rritur, tha Lulzim Basha, por Edi Rama dhe banda e tij e hajdutëve nuk kanë të ndalur.

“Vazhdojnë t’i rrisin taksat. Këtu u janë turrur baballarëve dhe nënave me taksat dhe tarifat e rritura, ja kryekrimineli, Gjushi i krimit 40 përqind e rriti çmimin e ujit në Durrës. Ku i çoi këto lekë? Beton për firmën e tij, leje ndërtimi për kriminelët që ka nxjerrë nga burgu me të cilët ka vjedhur votën e durrsakëve, me të cilët ka instaluar në Parlament anëtarët e bandave kriminale si Jurgis Çyrbja, Rrahman Rrahja dhe kukullën e krimit. Vetëm në listën e Durrësit dy kriminelë dhe një bedel krimi. Ky është parlamenti i krimit i cili mori fund me dorëzimin e mandateve të opozitës.”

Sa herë del para jush dhe shan opozitën apo merret me pjesët e mija të trupit, sa herë që del para jush ka një hall të madh. Ka një hall jo vetëm të fshehë vjedhjen, por të fshehë atë që nuk e fsheh dot më kurrë: që bota e tregon me gisht si kryehajdutin e Ballkanit, kryekriminelin e Ballkanit, Maduron e Ballkanit që shqiptarët do ta shporrin.

“Dhe dje halli i tij ishte gjigand: Departamenti Amerikan i Shtetit e tha qartë atë që çdo shqiptar e di. 10 vjet më parë Shqipëria hyri në NATO. Sot 10 vjet më vonë, miqtë tanë të çmuar, aleati strategjik i Shqipërisë dhe i shqiptarëve dhe partneri strategjik i PD-së dhe Lulzim Bashës, Shtetet e Bashkuara të Amerikës treguan të zezë mbi të bardhë të vërtetën që di çdo shqiptar: Nga bazë sigurie në bazë të rrjeteve kriminale, Shqipëria bazë dhe strehë e kriminelëve që veprojnë nga Amerika e Veriut në Amerikë të Jugut, nga Europa në Azi, vend kyç për trafikun e heroinës dhe të kokainës dhe kjo e gjitha për shkak, siç thotë raporti korrupsionit të përhapur në të gjitha nivelet e qeverisjes.”

Natyrisht ju e dini se për kë e ka fjalën, tha Basha, e ka fjalën për Vangjush Dakon, e ka fjalën për Edi Ramën, e ka fjalën për Saimir Tahirin, e ka fjalën për Fatmir Xhafën, e ka fjalën për Arben Ahmetajn. E ka fjalën për bandën e hajdutëve që vodhi votat dhe vazhdon të vjedhë Shqipërinë.

“Sa herë ta shikoni mjerushëm në sheshin e Durrësit si mbrëmë apo në ekrane duke u shtirur si klloun, kujtohuni. Nuk keni një klloun përpara, as thjeshtë një të sëmurë psiqik, por hajdutin më të madh që ka parë ky vend. 100 mijë euro në orë, kjo është bileta. 100 mijë euro është fatura e çdo shqiptari. 100 mijë euro paguan ky popull për estradën e shpifur të Edi Ramës,” tha Lulzim Basha duke konstatuar se shkaktari i varfërisë dhe krizës ekonomike është Edi Rama dhe largimi i tij është emergjencë kombëtare.

Pjesëmarrja e madhe e qytetarëve të Durrësit në këtë takim, që nuk ishte parë prej kohësh, për kryetarin e Partisë Demokratike është një shenjë e qartë se durimit i ka ardhur fundi dhe se rruga e vetme përpara, është ajo që sëbashku  kemi nisur. Edi Rama, tha lideri i opozitës, e di fare mirë se sikur nesër të mbaheshin votimet në Durrës dhe gjithë Shqipërinë, Edi Rama, Vangjush Dako dhe banda e tij e hajdutëve, do ta paguajnë shtrenjtë poshtërimin, hajdutërinë dhe krimin që kanë kryer ndaj çdo shqiptari, të majtë e të djathtë, në fshat e në qytet, të ri e të vjetër. Prandaj, e ka shkatërruar themelin e demokracisë, votën e lirë. Kush më mirë se durrsakët dhe shijakasit e dinë këtë?!”

“Dosja 339 është dëshmia gjyqësore e rënies së votës së lire, e shkatërrimit të zgjedhjeve, e kapjes dhe shkatërrimit të demokracisë. Dhe kjo është arsyeja se pse Edi Rama ka kapur drejtësinë, ka ndryshuar 5 herë prokurorët e dosjes 339, me shpresën se kështu do të vonojë fatin që e pret Vangjush Dakon, bashkëpunëtorin e Niçes me shokë dhe gjithë kupolën socialiste, deri tek Edi Rama, hajdutët e votave të durrsakëve, hajdutët e votave të shijakasve, hajdutët e vitave të qytetarëve shqiptarë.”

Ndaj, me zgjedhjet e vjedhura, me Gjykatën Kushtetuese të vrarë, me drejtësinë e kapur nuk kishte asnjë rrugë tjetër për opozitën për t’i shërbyer interesit publik. “Nuk kishte asnjë mënyrë tjetër për ne që të luftonim për t’ju mbrojtur dhe për të avnacuar interesat dhe kauzat tuaja, nuk kishte vendim tjetër që unë, si kryetar i opozitës dhe kryetar i PD mund të merrja, perveçse t’ua riktheja edhe një herë gjykimin ju, sovranit të patjetërsueshëm, qytetarëve të Durrësit dhe gjithë Shqipërisë,” tha Basha duke shtuar se era e ndryshimit që fryn nga Durrësi është treguesi më i mirë, sikundër Durrësi është barometri më i qartë për rrugën e re e që ka vendosur të ndjekë shumica dërrmuese e qytetarëve shqiptarë. Askush dhe asgjë nuk mund të ma kthejë nga kjo rrugë.

Së bashku e kemi nisur, së bashku do ta çojmë deri në fund këtë rrugëtim telë saktificës, tha kryetari i Partisë Demokratike sepse e dimë që në fund të kësaj rruge na pret diçka që e kemi ëndërruar tash 30 vite: Vlera, standarde, parime europiane, Kosto e përballueshme e jetës, Punësim per rininë, Liri, mundësi dhe barazi para ligjit për çdo qytetar, Fund krimit dhe korrupsionit, Fund pandëshkueshmërisë së politikanëve.

Me këtë rast, kryetari i Partisë Demokratike, Lulzim Basha ftoj qytetarët e Durrësit që me këtë përkushtim të madh që e kanë nisur betejën për këtë qytet të mrekullueshëm, këtë rrugëtim ta vazhdojmë kështu, së bashku, të palodhur, të papërçarë, plot besim tek njëri- tjetri, ndërsa përfundoi: “Ju ftoj të mos e humbisni besimin e rigjetur tek vetja. Përballë do të kemi një grusht hajdutësh, një grusht minjsh që nuk po gjejnë vrimë për të futur kokën. Shumë shpejt bashkia do t’i kthehet qytetarëve të Durrësit, shumë shpejt qeveria do t’i kthehet qytetarëve shqiptarë të bashkuar, të vendosur deri në fitore!”