KLP si KQZ, ka Vendimin e KPA dhe mblidhet ta diskutoj!
Ndërsa shqiptarët i kanë ende të freskëta marrëzitë e Komisionit Qendror të Zgjedhjeve, KQZ, dhe juristit Denar Biba kur kur diskutonte dhe rrëzonte dekretet e Presidentit të Republikës, sot shohin se edhe Këshilli i Lartë i Prokurorisë vepron me të njejtin standard ndonëse ka Vendimin e formës së prerë të Kolegjit të Posaçëm Apelimit, KPA, se kreu i KLP, Alfred Balla, largohet nga sistemi i drejtësisë për 15 vjet!
“Kjo mbledhje do të organizohet në sallën e mbledhjeve të Këshillit, në prezencë të Anëtarëve të Këshillit të Lartë të Prokurorisë, si dhe të ftuar përfaqësues nga Ministria e Drejtësisë, Prokurori i Përgjithshëm dhe Programet EU4JUSTICE dhe OPDAT. Media si gjithmonë është e ftuar të jetë e pranishme.
Diskutimi i ndikimit ose jo të vendimit Nr.23, datë 21.05.2024 të Kolegjit të Posaçëm të Apelimit mbi statusin e anëtarit të KLP-së, të zgjedhur nga Parlamenti si pjesë e Shoqërisë Civile Shqiptare, zotit Alfred Balla,” thuhet në njoftimin e KLP për mbledhjen e thirrur më 27 Maj në orën 11:00 nga Nënkryetari i KLP, Tartar Bazaj.
Ndryshe, KPA vendosi më 21 Maj të nxjerrë nga sistemi i drejtësisë, Alfred Ballën, pasi ai refuzoi ti nënshtrohet vettingut me pretendimin se nuk gëzonte statusin e magjistratit në momentin që kishte nisur procesi ndaj gjyqtarëve, prokurorëve dhe ndihmësve ligjorë, funksion që Balla e ka kryer në Gjykatën e Lartë.
Kreu i KLP ka reaguar ashpër ndaj këtij vendimi të KPA duke paralajmëruar se do ta çojë çështjen në Strasburg, pasi pretendon se largimi i tij nga sistemi i drejtësisë bie ndesh me Kushtetutën!
Alfred Balla ka të drejtën të mos jetë dakord ashtu si qindëra kolegë të tij që u flakën në rrugë nga KPA kur Balla heshti, por kjo nuk i jep të drejtën as atij dhe as institucionit që drejton që të largohet nga ai post në vartësi nga vullneti i tij ose KLP-së, duke humb kuptimin edhe të Reformës në Drejtësi!
Ndërsa “diskutimi i ndikimit ose jo të vendimit Nr.23, datë 21.05.2024 të Kolegjit të Posaçëm të Apelimit mbi statusin e anëtarit të KLP-së, të zgjedhur nga Parlamenti” nga ana e KLP-së nuk qëndron pasi Gjykatën Kushtetuese e shkriu vettingu i Edi Ramës ndonëse ata gjyqtarë ishin zgjedhur nga Parlamenti si Alfred Balla, kohë kur KLP nuk kishte ndonjë merak aq më pak ide për ta diskutuar ndikimin!
Gjithsesi, jetojmë në shtetin e Edi Ramës dhe moszbatimi i një vendimi gjyqësor të formës së presë nuk është ndonjë hata për një sistem që tashmë është shkërmoqur!
