KLP sot zgjedhë kreun e ri të SPAK, në garë mendësia e SHBA dhe BE!

Sot Këshilli i Lartë i Prokurorisë, KLP, do të zgjedhë kreun e ri të Prokurorisë së Posaçme kundër Korrupsionit dhe Krimit të Organizuar, SPAK, ku në garë janë 4 kandidatë dhe dy mendësi, ajo e BE dhe SHBA!

Ndonëse prezenca e përfaqësuesve të Ambasadës amerikane, Nancy VanHorn, dhe Ambasadorit të BE, Silvio Gonzato, u keqinterpretuan qëllimisht nga mediat në shërbim të Edi Ramës, KLP-së i mbetet të vendos që nga katër kandidatët, Klodian Braho, Elvin Gokaj, Doloreza Musabelliu dhe Adnan Xholi, të përzgjedhë prokurorin me mendësi amerikane për luftën e pakompromis ndaj krimit të organizuar dhe korrupsionit, ose atë evropiane që ka parasysh integrimin e Shqipërisë në BE, dhe do të vazhdoj duke mos e dëmtuar me luftën kundër korrupsionit, korrupsion të cilin qeveria e ka intensifikuar edhe më shumë me krijimin e SPAK-ut!

Intervistat në KLP filluan të zhvillohen në rend alfabetik, dhe secili kandidat ka në dispozicion 45 minuta.

Kush janë kandidatët?

Adnan Xholi

Është një nga kandidatët me përvojë të gjatë, i emëruar për herë të parë në vitin 2004. Aktualisht, ai shërben si prokuror në SPAK dhe mban edhe detyrën e shefit të Seksionit të Krimit të Organizuar, një rol kyç në luftën kundër korrupsionit dhe krimit të strukturuar.

Kjo është hera e dytë që Xholi kandidon për kreun e drejtuesit të Prokurorisë së Posaçme. Së bashku me Altin Dumanin dhe Elvin Kondilin ai kandidoi edhe në vitin 2022 kur mori vetëm votën e një prej anëtarëve të KLP-së, Sokol Stojanit. Xholi ka hetuar shumë nga dosjet e krimit të organizuar dhe korrupsionit.

Klodian Braho

I emëruar prokuror në vitin  2007, është po ashtu prokuror pranë SPAK që në krijimin e tij. Aktualisht mban detyrën e shefit të seksionit kundër korrupsionit në Prokurorinë e Posaçme. Ai ka patur një rrugëtim të gjatë në sistemin e drejtësisë, duke mbajtur pozicione të rëndësishme në hetimin e rasteve të korrupsionit. Braho është prokurori, i cili ka hetuar inceneratorin e Elbasanit.

Elvin Gokaj

Një nga prokurorët me përvojë në këtë garë është edhe Elvin Gokaj, i cili ka nisur karrierën e tij në dhjetor të vitit 2000. Ai ka qenë pjesë e SPAK prej kohësh dhe ka kontribuar në hetime të shumta me ndikim të lartë.

Gogaj ka hetuar kreun e Komisionit të Prokurimeve Publike, Jonaid Myzyraj në lidhje me abuzimet në disa tenderë. Akuza ka të bëjë me tenderin për mirëmbajtjen e aksit rrugor Shpal-Ura e Repsit me gjatësi totale 58.7 km dhe me vlerë 2.29 milionë euro. Për këtë procedurë prokurimi krahas Jonaid Myzyrajt, janë marrë të pandehur edhe 10 persona të tjerë, 7 prej të cilëve të akuzuar për shkelje e barazisë në tenderë publikë, kryer në bashkëpunim.

Doloreza Musabelliu

E emëruar në tetor të vitit 2004, është prokurore në SPAK dhe ka një rol të rëndësishëm në strukturën e Prokurorisë së Posaçme. Ajo është një nga prokuroret që ka qenë pjesë e grupit të kanë hetuar dosjen e “Plumbi i Artë” ku tre bashkëpunëtor të drejtësisë kanë zbuluar me dhjetëra krime  ndër vite në Shqipëri, të cilët deri tani janë konsideruar si ngjarje pa autor. Një tjetër dosje e hetuar nga prokurorja është edhe masakra e ndodhur në qendër të Lushnjës në 2017, ku u kërkua “burgim i përjetshëm” për Leart Haxhiun dhe dy shokët e tij Anterio Kaloshi dhe Orgest Bilbili.