Koalicionet parazgjedhore, KQZ Kosovë: Nesër përmbyllet afati
Subjektet politike kanë kohë vetëm deri nesër kur është edhe data e fundit siç e ka përcaktuar Komisioni Qendror i Zgjedhjeve, KQZ, për të deklaruar koalicionet parazgjedhore, për zgjedhjet e parakohshme parlamentare të 28 dhjetorit në Kosovë.
Gjithashtu, deri nesër është edhe afati për certifikimin e subjekteve politike që duan të marrin pjesë në zgjedhje dhe afat i fundit kur partitë politike që nuk duan të bëhen pjesë e procesit të parakohshëm zgjedhor të deklarohen se nuk duan të jenë pjesë e garës.
Këtë e ka bërë të ditur zëdhënësi i KQZ-së, Valmir Elezi që tha se të tri këto afate do të përfundojnë më 30 nëntor në ora 23 e 59 minuta.
Elezi tha se partitë politike, koalicionet, nismat qytetare dhe kandidatët e pavarur duhet të plotësojnë online formularin e aplikimit për certifikim për pjesëmarrje në zgjedhje.
“Deri më 30 nëntor subjektet duhet të dorëzojnë në KQZ, respektivisht në Zyrën për Regjistrim, Certifikim dhe Kontrollin Financiar, aplikimin për certifikim për pjesëmarrje në zgjedhjet e parakohshme për Kuvendin e Kosovës. Formulari, i cili është i ngjashëm me të proceseve të kaluara zgjedhore, është i vendosur në platformën elektronike të KQZ-së dhe i njëjti duhet të plotësohet online,” tha Valmir Elezi.
Ndërkohë, zëdhënësi i KQZ-së ka sqaruar se partitë politike që duan të marrin pjesë në zgjedhje përmes koalicionit, duhet ta njoftojnë KQZ-në për këtë mënyrë të përfaqësimit në zgjedhjet e 28 dhjetorit, si garë e parakohshme zgjedhore.
“Sipas Ligjit për Zgjedhjet e Përgjithshme, partitë politike të cilat janë të regjistruara në KQZ dhe të cilat duan të marrin pjesë në zgjedhjet e parakohshme përmes koalicionit duhet ta njoftojnë KQZ, respektivisht Zyrën për Regjistrim, Certifikim dhe Kontrollim Financiar të Subjekteve Politike se duan të marrin pjesë në këto zgjedhje në këtë mënyrë. Afati i fundit për të bërë këtë njoftim është data 30 nëntor 2025,” tha Elezi duke sqaruar se koalicioni mund të ndërtohet nga së paku dy parti politike.
“Partia politike nuk mund të tërhiqet nga koalicioni pasi të jete certifikuar deri sa rezultati i zgjedhjeve të certifikohet nga ana e KQZ. Gjithashtu partia politike e cila është anëtare e koalicionit nuk mund të marrë pjesë si anëtare në një koalicion tjetër apo edhe si parti e veçantë në të njëjtat zgjedhje.”
Zëdhënësi i KQZ-së foli dhe për një tjetër afat, atë për dorëzimin e listave me emrat e kandidatëve për deputetë, afat ky që ka nisur të rrjedhë nga 24 nëntori dhe do të përfundojë më 7 dhjetor.
“Deri më 7 dhjetor 2025 subjektet politike duhet të dorëzojnë në KQZ listën me emrat e kandidatëve për deputetë që kërkojnë të certifikohen për të marrë pjesë në zgjedhjet e parakohshme. Ky afat shënon një moment vendimtar në procesin zgjedhor, pasi pikërisht në këtë periudhë subjektet politike do të formalizojnë kandidatët për deputetë me të cilët do të marrin pjesë në zgjedhjet e funddhjetorit.”
KQZ: Deri më 6 dhjetor mund ta ndërroni qendrën e votimit brenda komunës
Komisioni Qendror i Zgjedhjeve, KQZ, ka bërë të ditur se është duke vazhduar periudha për ndërrimin e Qendrës së Votimit brenda së njëjtës komunë, në kuadër të zgjedhjeve të parakohshme për Parlamentin e Kosovës që do të mbahen më 28 dhjetor 2025, dhe afati skadon më 6 dhjetor 2025.
Sipas KQZ-së, ndërrimi mund të bëhet: përmes platformës elektronike të KQZ-së: qv.kqz-ks.org, ose; Duke paraqitur kërkesën në Komisionin Komunal të Zgjedhjeve në komunën përkatëse.
KQZ ka sqaruar se ndërrimi i Qendrës së Votimit nga një komunë në një tjetër nuk mund të bëhet përmes sistemit të KQZ-së. Ky ndryshim kërkon deklarimin zyrtar të adresës së vendbanimit nga vetë qytetari, në Zyrën e Gjendjes Civile apo përmes platformës E-Kosova.
Ndryshimet e bëra gjatë periudhës 26 nëntor – 6 dhjetor 2025 do të pasqyrohen në platformën elektronike të KQZ-së me përfundimin e këtij afati.
