Kocijançiç: Referendumi në Maqedoni, të reflektoj vullnetin e qytetarëve

Procesi i referendumit për emrin e Maqedonisë të reflektojë vullnetin e lirë të qytetarëve dhe pa përzierje nga jashtë. Ky ishte mesazhi i Zëdhënëses së Komisionit Evropian, Maja Kocijançiç nga Brukseli; Ndërkohë e pyetur nëse KE do t’i ndihmojë shtetit të Maqedonisë në luftën kundër lajmeve të rrejshme-ndikimit të faktorëve të jashtëm në fushatë, Kocijançiçtha se Evropa po i ndanë praktikat e tyre më të mira dhe se referendumi po organizohet nga një shtet sovran që është i aftë për zbatimin e këtij procesi.

“Bashkimi Evropian e mbështeti marrëveshjen e arritur për emrin, tani duhet të bëhen një varg hapash që marrëveshja të jetë përfundimtare. Referendumi është momenti kur populli mund të shfrytëzojë të drejtën e tij demokratike, ky është momenti i rëndësishëm për ta që të vendosin për të ardhmen e vendit të tyre dhe duhet të iu mundësohet që këtë ta bëjnë pa përzierje nga jashtë”, tha Kocijançiç.

Ndryshe, sot zyrtarisht ka filluar fushata për referendumin e ardhshëm, në të cilin qytetarët më 30 shtator duhet të deklarohen nëse janë për anëtarësim në BE dhe në NATO me pranimin e marrëveshjes midis Maqedonisë dhe Greqisë.

Bartës i fushatës është Parlamenti i Maqedonisë, ndërsa kryetari Talat Xhaferi paralajmëroi se do ta zhvillojnë fushatën në mënyrë transparente dhe të drejtpërdrejtë, pa diskriminim, paragjykime dhe me respektimin e dëshirës së çdo qytetari.

Në fushatën e Parlamentit do të përfshihen 71 deputetë nga të gjitha grupet parlamentare. Deputetët sipas vullnetit të lirë, qëndrimet e tyre të referendumit mund t’i shfaqin edhe në njësitë e tyre zgjedhore, ndërsa siç tha Xhaferi, nuk ka pengesë në këtë fushatë që të përfshihen edhe përfaqësues të tjerë të Qeverisë dhe partive politike.