Kodi i ri Zgjedhor, PPE: Të zbatohet në zgjedhjet e ardhshme parlamentare dhe lokale!

Grupi i Partisë Popullore Evropiane, PPE, pranë Parlamentit Evropian, duke konfirmuar përkrahjen e Shqipërisë në udhën e saj drejt Bashkimit Evropian, përshëndetë Marrëveshjen e arritur për reformën e Kodit Zgjedhor dhe pret që ai të zbatohet në zgjedhjet e ardhshme parlamentare dhe lokale.

“Grupi i Partisë Popullore Europiane vazhdon të përkrahë Shqipërinë në udhën e saj drejt Bashkimit Europian. Prandaj ne e vlerësojmë marrëveshjen mes qeverisë e opozitës për një pjesë të rëndësishme të reformës së Kodit Zgjedhor në përputhje me standartet e BE dhe OSBE. Kjo reformë duhet të përfundojë me këtë frymë dhe, mbi të gjitha, duhet të zbatohet në mirëbesim në zgjedhjet e ardhshme parlamentare dhe lokale. Këto zgjedhje duhet të jenë të lira e të ndershme,” thekson koordinatori i grupit për çështjet e zgjerimit, Michael Gahler, duke reaguar në emër të PPE përmes rrjetit social Facebook ndërsa shton se kjo është thelbësore për demokracinë në Shqipëri, por, gjithashtu, plotëson dy kushte të BE për fillimin e negociatave të antarësimit.

“Ne u bëjmë thirrje autoriteteve të punojnë për përmbushjen e 15 kushteve që duhet të përmbushë Shqipëria në menyrë që të çelen negociatat,” shprehet përmes një Deklarate, Grupi i Partisë Popullore Europiane pranë Parlamentit Evropian, duke përfunduar:

“Ne insistojmë shfuqizimin e legjislacionit që kërcënon lirinë e shprehjes dhe fillimin e procedurës penale kundër atyre që akuzohen për blerjen e votave në zgjedhjet e kaluara.”