Kodi Zgjedhor në “Venecia”, Varhelyi: Parlamenti të presë opinionin!

Pas vendimit të Presidentit të Republikës, Ilir Meta, për të kthyer ndryshimet e Kodit Zgjedhor të cilat u votuan pa u respektuar Marrëveshja 5 Qershorit ndërsa iu drejtua Komisionit të Venecias, dhe deklarimit të mazhorancës se Dekreti i Presidentit do të hedhet poshtë, ka reaguar Komisioneri për Zgjerimin pranë BE, Oliver Varhelyi, i cili i kërkon Parlamentit të presë opinionin e Komisionit të Venecias para se të rivotojnë ndryshimet.

“Kodi Zgjedhor i Shqipërisë: Unë besoj se Komisioni i Venecias do të sigurojë këshilla të shpejta për palët e interesuara shqiptare mbi zbatimin e Ndryshimeve Kushtetuese të 30 korrikut,” shprehet Komisioneri për Zgjerimin pranë BE, Oliver Varhelyi, përmes rrjetit social Twitter duke përfunduar:

“Parlamenti duhet të marrë në konsideratë pritjen e rivotimit për të marrë parasysh këtë këshillë. Duke pritur për zgjedhje të lira dhe të ndershme në prill 2021.”