Koha për zgjidhjen e krizës, Meta: Në 19 Tetor do të jetë shumë vonë!

Një ditë pas takimit me liderin e opozitës, Lulzim Basha, kur u bë e ditur edhe zgjidhja e vetme me zhvillimin e zgjedhjeve vendore, paralamentare dhe presidenciale më 13 Tetor, Presidenti i Republikës, Ilir Meta, duke rikujtuar se përpara kemi një datë tepër të rëndësishme, për ne dhe të ardhmen e vendit tonë, 17-18 tetor 2019, kur Këshilli i Bashkimit Europian do të marrë një vendim për çeljen ose jo të negociatave me Shqipërinë, i bënë thirrje palëve për zgjidhjen e krizës:

“T’u krijojnë mundësinë të gjithë qytetarëve shqiptarë që në mënyrë të qetë, civile dhe demokratike të shprehin sovranitetin e tyre për të gjitha institucionet, vendore dhe qendrore, përfshi dhe Presidentin nga populli, në 13 tetor.”

Presidenti i Republikës, Ilir Meta vlerëson përmes reagimit në rrjetin social Facebook se koha është tani ndërsa përfundon:

“Në 19 tetor do të jetë shumë vonë!”

Ja postimi i plotë:

KOHA QË TË MOS MBETEMI EDHE NË VJESHTË!

Të dashur qytetarë, 30 qershori iku si një datë e përbashkët vetëm kalendarike. Përpara kemi një datë tepër të rëndësishme, për ne dhe të ardhmen e vendit tonë, 17-18 tetor 2019, kur Këshilli i Bashkimit Europian, do të marrë një vendim për çeljen ose jo të negociatave me Shqipërinë.

Ndaj nuk mund të vazhdohet më të ecet në dy rrugë të kundërta, që nuk takohen me njëra-tjetrën: në një anë atë të kapjes së çdo institucioni, çdo zyre dhe çdo vendi pune, dhe atë të delegjitimimit të çdo institucioni nga ana tjetër.

Të dy palët duhet t’u krijojnë mundësinë të gjithë qytetarëve shqiptarë, që në mënyrë të qetë, civile dhe demokratike të shprehin sovranitetin e tyre për të gjitha institucionet, vendore dhe qendrore, përfshi dhe Presidentin nga populli, në 13 tetor.

KOHA ËSHTË TANI!

Në 19 tetor do të jetë shumë vonë!