Kokainë në konteinerin me banane nga Ekuadori në Durrës, arrestohet babai i Arbër Çekajt

Realizimi me sukses i operacionit të koduar ”Mersin” në Durrës ka vënë në pranga babain Arbër Çekajt, Selim Çekaj, në konteinerin e të cilët u kapën 49 kilogram kokainë.

Konteineri me 49 kg kokainë dhe banane kishte ardhur nga Ekuadori dhe kishte si destinacion Maminasit, ose më saktë firmën e babait të Arbër Çekajt. Gjatë kontrollit të konteinerit, u konstatua edhe sasia e kokainës.

Mësohet se firma e eksportit nga Ekuadori është hapur në po të njëtat ambiente në Maminas ku u kap dhe 3 vite më parë sasia prej 613 kg kokainë. Kompaninë ”Arbi Garden” kësaj radhe i ati e ka quajtur ”Ecoalmax” por nuk ka ndryshuar mënyra e transportit të kokainës në konteiner me banane nga Ekuadori.

Ndryshe, 3 vite më parë Arbër Çekaj u arrestua pasi në firmën e tij zbarkoi një konteiner me banane nga Ekuadori, që kishte brenda 613 kg kokainë. Për atë ngarkesë Çekajt iu sekuestrua firma ”Arbi Garden” si dhe mori dënimin nga GJKKO me 14 vite burg.

Njoftimi i Policisë

Finalizohet operacioni i koduar “MERSIN”. Operacioni i zhvilluar në Portin e Durrësit, nga strukturat e Policisë së Shtetit, në bashkëpunim me autoritetet doganore në Port Durrës.

Sekuestrohen rreth 49 kilogramë lëndë e dyshuar narkotike kokainë. Arrestohet në flagrancë poseduesi i lëndës narkotike.

Strukturat e Policisë së Shtetit, në vijim të punës për parandalimin, evidentimin dhe goditjen e trafikimit të lëndëve narkotike, bazuar në informacionet e marra në rrugë operative dhe hetimet e kryera se në një kontenier fshihej një sasi e konsiderueshme lënde narkotike kokainë, në bashkëpunim me autoritetet doganore kanë organizuar dhe finalizuar operacionin policor të koduar “MERSIN”.

Si rezultat i operacionit, gjatë kontrollit të imtësishëm të ushtruar në disa kontenierë, u bë e mundur që në njërin prej tyre, i cili ishte i ngarkuar me banane dhe ishte nisur nga Ekuadori me destinacion Shqipërinë, për llogari të një firme me qendër në Maminas, me administrator shtetasin S. Ç., të gjendej dhe sekuestrohej në cilësinë e provës materiale rreth 49 kilogramë lëndë narkotike e dyshuar kokainë.

Në vijim të veprimeve, nga Seksioni për Hetimin e Narkotikeve në DVP Durrës u arrestua në flagrancë shtetasi S. Ç., banues në Sauk, Tiranë.Nën drejtimin e Prokurorisë së Rrethit Gjyqësor Durrës, vijon puna për dokumentimin e plotë të kësaj ngjarjeje, identifikimin dhe kapjen e autorëve të tjerë të përfshirë në këtë veprimtari kriminale.Për arsye hetimore nuk jepen detaje të tjera rreth operacionit.

Materialet i kaluan Prokurorisë së Rrethit Gjyqësor Durrës, për veprime të mëtejshme.