Kokëdhima mbështet Bashën: Çdo kullë që do ngrihet mbi Teatër do të rrëzohet

Koço Kokëdhima, në emër të Partisë Zgjidhja, duket se ka mbështetur deklaratën e një dite më parë të kreut demokrat, Lulzim Basha, sipas të cilit nëse Qeveria Rama do t´i vendosë sot minat Teatrit Kombëtar, nesër do t´i vendosen minat ligjore kullave që do të ndërtohen. Basha paralajmëroi sekuestrimin e çdo centimetri dhe çdo euroje që do të përfitohet nga ndërtimi i kullave.

“Votat e deputetëve të partisë Zgjidhja, që do të jenë pjesë e Kuvendit të ardhshëm të Shqipërisë që do të dalë nga zgjedhjet e lira dhe të barabarta, do t’i bashkohen vullnetit të kësaj kontrate për të zhbërë votimin e projektligjit për teatrin më 5 korrik 2018, si antikushtetues dhe antiligjor.

Kush shkel ligjin sot, do të paguajë nesër, ndaj çdo kullë që do ngrihet mbi truallin publik të Teatrit Kombëtar dhe atij Eksperimental do të rrëzohet, ndërsa ndërtuesi do të detyrohet ta dëmshpërblejë prishjen e teatrit.

Zgjidhja fton shoqatat, organizatat, grupimet, individët, partitë opozitare parlamentare, veçanërisht PD dhe LSI, që të firmosin këtë kontratë të përbashkët Proteatër.

Paligjshmëria në këtë vend do të marrë fund vetëm kur të vendosen zgjedhjet e lira dhe të barabarta”, tha Kokëdhima.